十幾日前，孫柏文睇《華爾街日報》話管理兩個炒爆次按基金嘅BearStearns，會喺「最遲7月16日」公開基金裏面啲次按債券，直到6月30日值幾多錢。到我落筆嘅呢一刻，好似仲未有消息。
今時今日，好多擁有次按債券嘅單位，根本無法知道，甚至唔想知道啲次按債券值幾多錢。因為如果債券資產不抵債，分分鐘可以即時執笠。我唔知BearStearns幾時會公佈債券估值，同埋如果一公佈之後，其他基金會否相應下調自己手上債券嘅估值。不過可以肯定嘅係，好似一個完全被毀容嘅病人一樣，要第一次知自己今日係乜嘢樣，一定要有心理準備。
最後大家要謹記，BearStearns只提供佢哋覺得啲次按債券，喺6月30日嘅一刻值幾多錢。因為穆廸同標普反枱，將次按投資評級大幅下調，今個月先至開始發生，花旗國樓泡沫呢個故事，真係長爆長有。大家準備接收聯儲局印出來嘅銀紙啦！
金手指網誌：
http://phatdat.blogspot.com