中國中信集團前掌舵人王軍06年退休後，動向一直都係個謎，只知佢𠵱家做緊幾間上市公司嘅主席，但都係冇乜大搞作。最近終於有佢復出嘅新消息，原來佢喺香港成立咗一間投資公司，仲搵到美國私募基金入股，然後走咗去新疆大舉投資。聽講計劃投入嘅資金高達50億，都咪話唔重槌。
美國股東負責考察
內地媒體話王軍係透過一間叫中國天然投資嘅公司進軍新疆，目標係煤化工、煤電、銀行同房地產。上個月底王軍仲見過烏魯木齊市委副書記同市長㖭，傾吓中國天然今後三年喺新疆嘅投資大計。
中國天然除有意入股烏魯木齊市商業銀行、起個大型新疆國際會展中心外，仲有意投資10億收購同擴建三個煤炭生產基地。08年後就投入20至30億搞煤炭化工同煤電項目。
據講，中國天然曾經去新疆實地考察過幾次先至出手，唔係冇做功課㗎，不過，當時王軍就冇現身，只係由美國基金嘅負責人出面。若果身為中國天然董事長嘅王軍肯出嚟見傳媒，相信可以解答到點解要去新疆投資呢個謎團嘞。
講番王軍，佢喺中信集團足足做咗27年，不斷咁執靚間公司，摺埋嘅子公司有成600間咁多。今年66歲嘅佢，𠵱家係保利香港（119）、中信21世紀（241）同金榜集團（172）嘅主席，最近又做埋香港建設（190）名譽主席，呢幾間公司，股價都一度升到砰砰聲。
華華對王軍最印象深刻係佢好鍾意食煙（簡直係煙鏟一名），唔知退休後壓力冇咁大，係咪食少咗或戒咗呢？
[email protected]