自從法國紀錄片《小企鵝大長征》（EmperorJourney）同電腦動畫《踢躂小企鵝》（HappyFeet）舊年大收旺場之後，荷李活製作人就愛上用企鵝做故事主人翁，貪佢夠可愛又夠人氣。《滑浪奇兵》（Surf'sUp）就係喺呢個熱潮下乘勢推出，仲集兩部企鵝片之大成，炮製出集喜劇、動作、刺激同溫情於一身嘅合家歡動畫。撰文：戶川淳
下月2號喺本地上映嘅動畫《滑浪奇兵》，標榜「識得滑浪嘅企鵝」，喺酷熱天氣下都可算係一道清泉。企鵝仔廸廸天生與別不同，唔鍾意孵蛋同食魚生，但好鍾意滑浪。有一日，廸廸決定離開家鄉，去滑浪勝地「企吾島」參加一年一度嘅「大海之師滑浪精英挑戰賽」。
巧遇大師
廸廸認識咗唔少新朋友，包括來自密西根湖嘅雞仔祖、著名滑浪宣傳能手古烈治、專門發掘滑浪新星嘅麥國基，以及美艷動人、充滿活力嘅靚女企鵝救生員伶俐。大家都知道企鵝仔廸廸好有滑浪潛質，一次機緣巧合下，廸廸遇上滑浪界傳說之神「大師」，從此改寫命運。
話《滑》片係集兩部企鵝片之大成，真係一啲都唔過份，事關導演同編劇以紀錄片形式，電影以一隊攝製隊追訪企鵝仔，去交代成個故事，所以觀眾不時睇到主角對住個鏡頭扮接受訪問，算係電腦動畫嘅新突破。既然話得係老少咸宜嘅動畫，梗係有啲教育意義啦！動畫除咗帶出「努力追尋夢想」嘅重要訊息外，又話畀觀眾聽「勝利唔係代表一切，反而過程中所學懂嘅，先至最重要。」
畫功細緻
一齣受歡迎嘅動畫，點少得細緻嘅畫功！現實生活中拍攝水花濺起嘅場面都已經夠難，將佢畫成動畫就難上加難。為咗營造逼真嘅波濤洶湧效果，監製動用幾十名電腦特技創作專家，專門設計唔同形式嘅浪花同海浪層次。至於企鵝嘅滑浪姿勢都同樣仔細，好似企鵝仔滑浪時身上嘅毛髮線條、浪花投射喺身上嘅陰影，都一絲不苟，製作隊仲參考唔少書籍同紀錄片，再問埋世界級滑浪好手去認證㖭，認真厲害！
我是誰：企吾島精英
馬高廸（廸廸）
出生喺南極洲打冷鎮嘅企鵝，雖然身形細粒，但志向遠大。廸廸深信勝利會帶來一直渴望得到嘅讚美同尊敬，最崇拜嘅偶像就係「大師」。
大師
企鵝，滑浪界傳說之神，有出色嘅滑浪技巧，以及無企鵝能及嘅自信同感染力。不過10年前一場比賽，大師喺滑最後一浪時突然消失。
雞仔祖
公雞仔，來自密西根湖中西岸農場，佢參加滑浪精英挑戰賽唔係為咗奪標，只係因為鍾意滑浪。佢同廸廸都係俾自己嘅族裔排斥，所以特別老友。
古烈治
善於操控群眾嘅水獺，當年好友大師喺滑浪比賽中失蹤，利字當頭嘅佢都冇傷心過，只顧利用其他企鵝對大師嘅懷念同崇拜，推出首飾商品圖利。
伶俐
美艷迷人嘅企鵝女，雖然佢係滑浪高手，但唔鍾意炫耀，樂於喺沙灘上擔任救生員角色。伶俐係大師嘅姪女，只有佢知道大師仍然在生。