看電視台靚女主播兼記者宣讀新聞，講市長與太太離婚的傳聞屬實，市長在兩小時前已宣佈離婚。電視觀眾聽完就算，頂多話市長風流，梗係有婚外情啦。
一個月後，真相揭曉，市長向報紙承認，離婚係由太太主動提出嘅，因為佢自己有婚外情，第三者就係嗰位電視台靚女主播。呢位女主播巴閉咯，○三年時就與議會議長搭上，○五年就改與市長發生關係，一路以記者身份採訪政治新聞。
呢單新聞如果發生在香港，肯定轟動，不過真實地點係洛杉磯，市民一於懶理，引起爭議嘅唔係市長偷食，而係女記者恃靚埋身，採訪市內高官與他上床，違反新聞專業操守，有乜理由自己宣讀埋「市長離婚」嘅新聞㗎？用此手段嚟攞第一手內幕新聞，好唔妥啫。無怪南加州大學新聞系教授認為呢位靚女主播應該停職。
女記者採訪名人，因而認識，繼而拍拖，最後結婚呢類故事，經常發生，香港都有，反而男記者訪問女強人而與女強人結婚嘅，聽都未聽過。係唔係男女不平等呢？大家得閒可以研究吓。老實講，男記者追女名人，難度甚高，靚女記者有意思嘅話，畀男名人追到上手，過程容易好多！
以前外國政壇發生所謂「性醜聞」，當事人多數被迫下台，但自從戰後第一代克林頓喺白宮與女練習生勾搭，詭辯成功，逃過一劫之後，政壇性醜聞嘅殺傷力逐漸減少，到啲戰後第二代，四十零歲嘅人士掌權，婚外情變成「個人私隱，與工作無關」，只係普通新聞，唔係「醜聞」，故此LA市長有婚外情而無政治慘情，三藩市市長有「美國馬英九」之稱（因三藩市多華人之故），與女秘書亦即競選經理之太太勾搭，成個辦公室都知，獨係競選經理蒙在鼓裏，發現之後，想話要求調去一啲肥缺遭拒絕後，先至憤而爆料，公開自己戴綠帽之事。如此男人，可謂無癮到極，自己死砌幫市長競選成功，竟然賠埋老婆，跟住因爆料而失業。反而靚仔市長一味話做好佢份工，民望高到極，今年幾乎篤定連任。新世代選民只注重實效，投票時較少考慮候選人私德，此乃新趨勢。