行得女人街，就從來都無期望過會買到真貨，唔小心買到假貨，都唔使激氣，因為分分鐘笑到你反肚。最近去女人街兜咗轉，發現檔口賣嘅老翻越來越有創意，要仿真度極高嘅固然有，要有創意高嘅一樣有。有時用心欣賞吓佢哋嘅精心傑作，都咪話唔過癮！今日就同大家搜括咗女人街九大搞鬼老翻之作，笑吓就得，講到畀錢買，當然要支持正貨啦！
記者：葉雪芯
攝影：黃子偉
Model：Kiterick@PureModels
第1位：TheRollingStonesTee
箍牙版Lam脷Tee
潮人成日嫌TheRollingStonesTee來來去去無變化，估唔到女人街先最潮，唔玩條脷，轉為喺棚牙上面做手腳！小記就搵到獨一無二「箍牙版」燙印Tee，喺棚牙上面加幾筆，變到好似箍牙咁，勁搞鬼好笑！小記以放蛇形式追問咗老闆娘真貨係咪真係出過呢個版本，佢就實牙實齒咁答：「梗係有啦！」呢款Tee係即燙即印，T-Shirt有得揀顏色尺碼，仲有得揀印大脷定細脷㖭，食正個Customize熱潮，計我話，新年着最啱，紅噹噹嘅大吉大「脷」，幾好意頭！小記仲見過有甩牙版㖭，行女人街畀啲心機實搵到。
創意度：★★★★★（滿分！）
搞笑度：★★★★★（滿分！）
價錢：$45（未講價）
第2位：路牌無正字！
最近女人街十檔有九檔都賣香港路牌，蘭桂坊、尖沙嘴、旺角……乜名都有。香港人又點會無喇喇買個路牌返屋企先？呢啲咁嘅紀念品擺明就係搵外國人生意。但老翻路牌竟然寫錯字！連人氣爆燈嘅昂坪寫都成「昴」坪，最奇怪嘅係英文無串錯，不過中文字就寫錯！大佬呀，中國人連中文字都寫錯，仲話幫手宣揚中華文化香港特色，真係香港點解有你？影衰我哋㖭啦！係咪製作呢啲路牌嘅商人無睇過貽興王嘅《最緊要正字》呢？
創意度：★★★★
搞笑度：★★★★★
價錢：$49（未講價）
第3位：Levi's×Converse開拖？
暑假來了，後生仔女一定最愛去海灘玩，正當小記打算去買番對靚靚人字拖嘅時候，竟然有新發現！Levi'sCrossoverConverse？我有無睇錯？先唔講Levi's有無出過呢個鞋款先，再睇埋個印章，呢對拖鞋就一定無可能係堅嘢！個印章係Converse嘅標記，無喇喇變咗係Levi's商標，睇到我好迷……
創意度：★★★★★
搞笑度：★★★★★
價錢：$45（未講價）
第4位：射喱鬥雞眼版
RMC侍郎牛仔褲
人怕出名豬怕肥，本地品牌RMC牛仔褲紅到去外國，NBA球星嚟香港都第一時間去買，女人街呢個潮流指標點會無發現！小記發現，其中經典RMC老牛──侍郎牛仔褲就不幸被姦污。不過呢啲「老翻繡」認真搞笑，侍郎唔係俾人繡到變咗鬥雞眼，就係射喱眼，明明好威武嘅樣，搞到有眼疾咁！老翻手工差一眼就睇得出，如果手工好，都唔使只係賣正貨一成價錢咁筍啦！RMC老闆馬田一鳴唔使嬲喎，因為紅先有翻版，睇完咪得啖笑囉！
創意度：★
搞笑度：★★★★★
價錢：$160（未講價）
第5位：BapeSta×NewEra無中生有波鞋
日牌鍾意玩Crossover，一年閒閒哋交叉幾十次，要知同乜品牌合作過，真係唔易，咁老翻咪有機可乘囉。小記就搵到BapeSta×NewEra嘅奇景！但Bape係無同NewEra玩過Crossover㗎！呢個老翻手工奇差，鞋舌招牌唔工整，繡線疏落，鞋踭嘅Logo仲甩晒線，商標繡到歪晒，鞋櫳用料差，最搞笑係左右鞋身上嘅NewEraLogo上下唔對齊！
創意度：★★★★
搞笑度：★★★★
價錢：$280（未講價）
第6位：動物玩交叉！猿人×米奇Tee
猿人和米奇是不是好朋友？係另一個謎。我唔係Adam鄭，又唔係貽興王，不過絕對可以幫你解開呢個謎！猿人暫時未同米奇做過好朋友。呢件Ape啡色Tee，最大嘅敗筆就係個招牌，整個米奇標記落去，仲由Micky改名做Miki，夠晒搞笑兼無厘頭。質素亦唔見得好。而衫腳個Copyright標記甩晒膠，勁騎！
創意度：★★★★
搞笑度：★★★
價錢：$25（未講價）
第7位：Harrods袋突然有鏈用
「邊樣受歡迎，就老翻邊樣」。可能啲老翻商人得知英國老牌百貨Harrods嘅手挽PVC袋呢期受OL歡迎，所以大量製造。假袋像真度頗高，但部份質素好差，無Harrods招牌不特止，仲手多多幫佢加條拉鏈，內櫳仲加多個細內袋，最搞笑係內外兩截色！
創意度：★★★
搞笑度：★★
價錢：$45（未講價）
第8位：死亡筆記簿真假難分
呢個可算係女人街老翻中最真貨品！市面上的確有文具商推出死亡筆記簿套裝，連同死神羽毛筆同電影音樂大碟。而呢套老翻就好認真，裏面有晒使用者守則，內頁仲有主角夜神月寫過嘅人名。隻CD又真係有歌聽。筆記簿製作可媲美真貨，不過衰在支羽毛筆係寫唔出嘅，隻CD嘅包裝亦十分粗糙，出賣咗佢係老翻嘅真身。
創意度：★★★
搞笑度：★★★★
價錢：$29（未講價）
第9位：A&F竟然有黑色
因為喺香港無專門店，搞到周街都係A&F老翻。眾所周知，A&F嘅特色九成九係經過複雜洗水工序，剩低嗰0.1機會都一定唔會出黑色，所以肯定係假貨！最抵死嘅係左下角隻大麋鹿Logo無晒線條輪廓，變咗肥鹿，呢啲真係捉到鹿唔識脫角囉。
創意度：★★
搞笑度：★★★
價錢：$75（未講價）
