要在素淨的設計中有點特色及睇頭，物料上須花點心思。今次雲景台的單位就引入新意，客廳以6條鋼線吊起長方形層板，層板上裝設光管，做到四面透光效果，較傳統貼牆釘層板做假天花燈槽更別致，光線更均勻。由於做法另類，工序複雜，需要由多位師傅合力安裝，留心調校垂直線，避免出現左右高低情況。
設計師Ernest特別選用不銹鋼片，做女兒房書枱枱腳，質感冰冷有型，慳位之餘不會阻礙房門開關，減少撞傷機會。男孩房家具選用壓紋木板，板料密度高，質感堅硬耐用，加上壓上方格圖案，再噴聚光面纖維焗油，做到瓷磚效果，觀感得意。
主人套房貫徹客廳格調，訂做白色及胡桃木家具，若干層架加水晶膠托架，晶瑩通透，亦煥發清新朝氣。
