看改革後的《勁歌金曲》，大開眼界，令人欣喜的是堅持要歌手/偶像現場唱Live，這令迷哥迷姐們起碼得個知字，知道喜歡的/崇拜的歌手/偶像究竟有幾唱得/幾唔唱得，曾經有一段時間興唔唱得，唔係講笑，真係曾經興過。今時今日齋靠樣都唔係話一定冇得做，但如果唱嚟唱去都係卡拉OK水準以下，然後賴發燒或喉嚨無名腫痛，結果成就都只能得到老鼠尾生瘡──大極有限。
《勁歌金曲》當晚是拳擊之夜，一開場由專業健美女泰拳手輕鬆自信地率領兩隊女子組合出場，「Hotcha」幾位小姑娘仍有學生味，寓工作於娛樂，一定是本身很喜歡跳舞所以成立跳舞組合，另一隊「Freeze」就勁嘞，身穿貼身衣裳載舞載舞，不是寫錯，是她們三位現身《勁歌金曲》竟然冇唱歌，只是着貼身衫跳舞，那她們的定位究竟是甚麼？歌手？舞者？貼身衫人？
性感的鄭融當晚唱新歌，麻雀雖小但勝在瓣瓣齊，有樣有身材能歌善跳有自信騷在骨子裏，但當晚的飲衫卻奇怪地遮掩了鄭的優點，突出了缺點，靚唔靚我唔識睇，只覺鄭穿了那襲如衫裡衣料做的衣裳，本來的TurnOn變成了Turnoff。
崔建邦是散打好手，拳擊啱晒發揮，但出力得滯反而連累講嘢氣羅氣喘。勤力的劉華繼續勤力，又教太極劍又教魔術，睇咗兩集，鄭中基玩嘅魔術再呃我唔到。
當晚《勁歌金曲》嘅大贏家唔係「Hotcha」、唔係「Freeze」、唔係鄭融、唔係崔建邦，甚至唔係劉華，竟然係女泰拳手，贏在唔處心經營，淡淡定定笑容滿面，無乜嘢但又好有嘢，所以好睇。