維基百科係最成功網站之一，香港「維基人」噚日成立香港維基媒體協會，有「維基人」話，初時喺維基網寫嘢時十足開荒牛，千辛萬苦先建立到今時今日大家見到嘅維基網內容。呢班後生仔無怨無悔、不計報酬為網民服務，的確值得嘉許，立法會資訊科技界議員單仲偕噚日就到場鼓勵佢哋。
單仲偕話佢都成日睇維基百科，遲啲佢去西藏旅行，未出發先興奮，都要上維基睇吓當地資料做定功課，不過佢講笑話自己係CD-ROM（CompactDiscread-onlymemory），即係齋read唔寫，所以佢叫班「維基人」要認真咁做好本份，因為好多人，包括單仲偕自己都相信維基上面嘅資料，錯咗就弊。