唔少高官政客趁暑假外遊避暑，行會召集人梁振英噚日坐國泰機舉家飛羅馬度假，點知旅程一開始就發生令佢𤷪𤺧嘅小風波。話說CY全家坐經濟位，登機後佢發現個位盞夜燈唔着，要求換位；有乘客喺羅馬打長途電話向八方投訴，指班機爆棚，冇位換，有人發爛渣兼撻朵，擾攘一輪，航班延誤成個鐘先起飛。
八方向國泰查詢，國泰話梁振英曾要求即時維修夜燈，但起飛在即冇辦法；空姐建議佢換位，但CY就婉拒咗。國泰又話航班延誤係因為有乘客臨時上唔到機，要搬番啲行李落機，班機只係延誤16分鐘，唔關CY事。對於被指發爛渣，知情者話絕無其事，CY今次被人寃枉。
有目擊者同八方講，由於CY要睇文件，盞燈唔着「佢有啲𤷪𤺧。」目擊者聽到空姐提出幫佢換位，但佢話：「唔好因為我嘅身份而咁做。」最終空姐請CY坐機尾吉位，事件先平息。