上周六講過睇SDI見對沖基金活躍於買賣轉型概念股，近日發現連傳統資產股都被睇中。上周五新鴻基公司（086）獲Penta增持227萬股，持股量增至12%，呢隻係聯合系內公司之一，出名折讓夠大，近日系內公司股價正以90度角上升。
另一隻冷門Assetplay南聯地產（1036）大股東鄭氏透過場外交易增持股份。此股雖然平日成交疏落，但年初至今已由12.60元升至16.40元，而且幾乎每日升少少，揸到𠵱家都幾唔錯。資產股升勢，應該點都唔及爪哇控股（251），近兩個月由4.50元升至6.60元，幾乎升咗5成。
現在才去追爪哇，相信好難克服畏高症，其實市場仍然好多優質Assetplay，除咗廖創興企業（194）之外，永安公司（289）亦係其中之一。永安係零售股，由於旗下物業位置極佳，實際亦係物業投資股，其年報為方便投資者比較，第25頁詳列過去5年業績，可見營業額及純利均非常穩定，同時過去5年固定資產由40億元增至57億元，升值近5成。
年報第26頁詳列有關投資物業，除幾項澳洲及美國物業之外，主要是上環永安中心、尖東永安廣場及彌敦道永安九龍中心，全屬旺區物業。永安最新NAV每股21.44元，現價有4成折讓，是罕有大折讓Assetplay。
創板股紛炒賣殼
以往創業板股係草，因為質素參差之餘，好多時上市後連成交都欠奉，但自從港交所（388）大幅收緊創板上市條件，以及多家公司借創板殼上市之後，創板股又由草變寶。近日可見升幅榜幾乎必有幾隻係創板股，上周五30大升幅榜股中，竟有10隻屬創板股。這類股份好多純炒賣殼概念，分析業績基本上無乜意義，應從成交異動着手，短炒一轉。