好多人喺同一行業可能會不斷轉工，但一世人就未必會轉好多行，轉行確實比轉工需要更大勇氣，尤其當年紀越來越大嘅時候，就算明知繼續死守喺原位唔會有突破，都唔願意冒險試新嘢。
不過話分兩頭，即使你有衝勁面對新挑戰，想轉行都唔係話咁易，要說服新老闆畀你入行，需要啲技巧，《CNNMoney.com》就醒咗幾招畀想轉行嘅網友：
1.表現熱誠
老闆日理萬機，最怕員工流失率高，成日要請人，尤其係新丁仲要花人力物力去教。如果你有心轉行，又唔想俾老闆覺得你「做唔長」，最好就表現到對份工好有熱誠，例如講佢知你會去報讀相關課程惡補不足；又或者應徵全職工前，先做份兼職攞經驗。
2.量化技能
未來老闆對你原本做開嘅行業未必咁熟，任你講到天花亂墜，佢根本無法評估你有幾叻。你不妨嘗試將過去努力嘅成果量化，變成簡單嘅數據畀佢參考，例如話你有能力增加銷售額幾多個百分點，又或者曾經管理過幾多個下屬等。
3.學習術語
雖然你係門外漢，但見工時識講兩句行內術語，應該可以爭取到唔少印象分。
4.兩步到位
職業包括「職位」同「行業」，假如你係律師但想轉行做旅遊寫手，兩份工風馬牛不相及，點算好？較有效方法係運用你嘅專業知識，幫出版社寫有關法律嘅書；有咗寫作經驗之後，再用寫手身份轉攻旅遊，咁就連所屬行業都轉埋。
5.面對現實
轉行同轉工唔同，以前喺所屬行業累積到嘅經驗，喺另一個行業可能無用武之地，所以轉行前應先評估經濟狀況，再參考有關薪酬行情，先有心理準備，預咗會被減人工當交學費。