可能內地造紙利潤真係唔講得笑，喺紙品貿易行頭做到響晒朵嘅森信集團（731）要撈過界，同造紙女王、玖龍紙業（2689）主席張茵爭飯食。森信話，佢哋會以總代價約799.76萬銀，買入江蘇遠通紙業嘅99%權益，而呢間公司專做牛卡紙同瓦楞芯紙。
森信話按已批准嘅生產規模，江蘇遠通嘅年產規模約15萬噸牛卡紙及約10萬噸瓦楞芯紙，雖然仲未開始營業，但相信完成收購後，可以為集團帶嚟貢獻喎！華華聽聞，近年做紙品貿易嘅毛利率一直萎縮緊，唔知同森信搞造紙嘅決定有冇關呢？
不過，森信要達成呢個造紙嘅鴻圖大計，首先要為江蘇遠通支付約2.32億元註冊資本，成個項目嘅總投資額更高達7億銀，真係一啲都唔講得笑。玖紙用咗10年時間，先將佢哋嘅產能由20萬噸增加到約莫535萬噸，唔知森信有冇諗到咁長遠呢？
[email protected]