敏妮過咗一個頗傷感嘅周末早上，參加一位舊同事太太嘅追思禮拜，佢因為腦癌過咗身，離開時仲係好後生好靚女。仲記得佢哋結婚時，敏妮都有出席婚禮，諗返就好似噚日嘅事，人生無常，所以大家真係要珍惜眼前人，活在當下。
參加完追思禮拜，幾個同事講開其實好多病，事前真係冇乜徵兆，就算定期檢查身體，最多都係睇吓有冇血壓高、膽固醇，好少會照吓個腦有冇事。
靠公司嗰份唔夠
講吓講吓，大家就講到保險呢個話題。敏妮一直覺得，保險產品五花八門，但只有一種唔買唔得，就係醫療保險。Touchwood講句，當遇到有大病嘅時候，無論自己抑或家人已經要為病情煩，如果喺呢個時候仲要煩埋錢銀，點算？
先唔講政府想推行嘅「強醫金」，要成65歲先有得攞。好多人恃住公司有份員工醫療保險，自己就唔使買，就算畀你做一世冇人炒，但假如患嘅病係癌症咁大件事，你估單係公司份醫療保險夠唔夠你睇醫生吖嗱！何況做老闆嘅都會諗吓點樣慳成本，點會幫員工買最好嘅保障。
買貴啲貪保額高
仲有，成日都聽到好多公立醫院醫療失誤，前兩日睇報紙就話，伊利沙伯醫院一個病人入醫院割腎，點知手術之後醒番先發現，肚入面留咗粒喺醫療儀器掉落嚟嘅螺絲；之前仲有3宗「通波仔」手術搞到個病人死咗，醫院管理局嘅揸fit人唔係出嚟認錯，而係話人篤佢有陰謀。
如果有咩事，你夠唔夠膽畀條命呢班人「教飛」？所以敏妮覺得乜嘢都可以慳，買份好啲嘅醫療保險點都唔好慳。醫療保險分好多級，通常用病床級數嚟分，敏妮投保嗰間保險公司分大房、半私家房，同私家房3級；敏妮唔係有錢人，但都揀咗半私家房，講緊都幾千蚊一年㗎，唔係話要住間好啲嘅房，而係保額問題。
除開幾百蚊個月
入得醫院，尤其係私家嗰隻，一粒棉花、一隻紙杯都係錢，如果只係基本保險，隨時claim盡都唔幫補得好多，醫療保險有樣好，實報實銷，你公司嗰份claim唔足，餘額可以喺自己份度claim，只要唔過保額範圍就可以claim足。除番開幾百蚊一個月，買少件衫、唱少次K，甚至乎抽隻新股都賺得返，對自己好啲，又唔使家人擔心，值得吖！