英超球會紛紛東來掘金，惟獨車路士另有門路，上周六同廸士尼達成4年合作計劃，話唔定稍後會派出杜奧巴、艾辛、「林伯」等球星潮扮米奇老鼠、唐老鴨等卡通人物，強勢「進駐」廸士尼；同時，車仔內部亦傳出另一喜訊，就係領隊摩連奴同班主阿巴莫域治重修舊好！
喺極有生意頭腦嘅行政總監簡安引領下，車仔寄望喺商界同曼聯平分秋色，球會日前宣佈，與娛樂界巨型品牌廸士尼拍膊頭搞生意，希望造就雙贏局面。
查實，廸士尼本身有同美國四大運動嘅球隊合夥，好似冰曲隊、棒球隊等，而最為人熟悉嘅應該係NBA球隊奧蘭多魔術，而後者之前亦有派球員去廸士尼遊覽，扮「鼠」扮「狗」做宣傳大使；睇嚟嘴部線條厚大嘅艾辛扮唐老鴨走唔甩，而有幾分「卡通樣」嘅林伯、杜奧巴、泰利等球星，就要諗定飾演米奇定米妮喇？
摩連奴同油王又好番
車仔嘅喜訊真係一單接一單，領隊摩連奴日前同阿巴密密斟後，表示兩人已冰釋前嫌，心無芥蒂，更透露自己起碼教多車仔8年喎，相信「車」迷聽到後可以放下心頭大石啦！另外，車仔首場季前熱身賽亦報捷，新兵馬隆達先送見面禮，加上隊長泰利嘅頭槌，以2:1反勝墨西哥球會CF阿美利加，算係個好開始。
有人喜歡自然有人愁，被唔少人視為去季最失敗收購嘅舒夫真高，有傳快將重穿紅黑7號戰衣！「軍刀」前東家AC米蘭啱啱送走奧利華拉，7號球衣又再懸空，意國傳媒指AC準備斥資1,500萬鎊（約2.4億港元）召佢回巢；球迷隨時無緣見到「軍刀」扮廸士尼人物喇！