煲呔組班任用親信，帶挈唔少人升官，一班AO前日放工後就喺政府總部開P，happyhour鬆一鬆。CS唐英年、FS曾俊華、環境局局長邱騰華同新聞處處長馮程淑儀都有到場一齊摸吓酒杯底。據講今次由副行政署長袁莎妮做「康樂組組長」，負責call人，主要邀請啲成日同CS、FS辦公室有工作關係嘅同事，等大家多啲溝通，第日做事更合拍有隊形。
人人都知唐英年收藏大把靚紅酒，有佢出現嘅場合自然有好酒，當日大家就品嚐咗五、六支佳釀，靚酒最緊要有人欣賞，邊個請都冇所謂。到場嘅人則要帶啲小食嚟，好似火腿、芝士嗰啲用嚟送酒，有份飲酒嘅人話，由於現身嘅10幾個人都係官場明日之「升」，場面十足升官慶功宴。
官員想增加資源
有人同八方講，當日一啲官員唔知「借醉行兇」定酒後吐真言，兩杯落肚乘機同兩位司長講，自己個局要增加資源，𠵱家庫房水浸，希望司長喺政策委員會同預算案度鬆啲手，咁就易辦事嘞。唐英年同曾俊華都係飲得之人，想乘機說佢哋開水喉？冇咁易啩。