花旗股市上禮拜四狂升之後，禮拜五仲繼續升，即係話大戶推上嘅決心好大，亦有咁嘅能力，道指升咗上13900樓上收市，呢個禮拜破14000關應該冇乜問題。
港股今日會點，仲要睇國內有冇新宏調措施出台，如果一切冇變，咁樣今日個市都穩中偏好，但升幅應該唔會太大，因為成交縮咗好多，即係話嚟到呢個水平，投資者態度有啲審慎，講真，𠵱家連大行都話港股比佢哋嘅預期升得快，暗示佢哋認為港股會有調整，係唔係咁，仲要睇，不過，升咗咁多，個市好有可能轉炒個別，俊樺認為最好炒嘅都係「六行三保」，𠵱家啲銀行股唞緊氣，保險股就好強，集中火力炒保險股係上策。
財險C輪5998：3隻保險股都有各自嘅概念，平保（2318）同國壽（2628）係恒指成份股，大戶挾個市上去唔會少得佢哋嗰份，財險就升得有勁，聽講有啲嘢搞緊，年內目標價同現價6.94元仲有好大距離，可以買番啲財險C輪5998博吓。隻輪上禮拜五收1.07元，槓桿率6.5倍（有效3.6倍），正股短線睇7.60元同8.20元，升到呢兩個位，5998應該喺1.46元同1.86元樓上，正股跌穿6.50元止蝕。