明星開公司，好少聽到有成功嘅例子，用明星嚟到做賣點嘅上市公司亦唔見得有好成績，好似以前嘅東方魅力咁；不過，前幾日網友Alvinchan喺《香港討論區》問：「如果劉德華自己開公司上市，集資2億銀，唔知大家有冇興趣認購呢？」
Sinfat覺得：「係華人都識得劉華，大陸佢有大把粉絲，相信會吸引唔少大陸資金追捧。」大隻金認為：「只要佢每年喺股東大會開場演唱會，就已經大把歌迷仆到去買！」
股東會變演唱會
Ymcvb亦話：「淨係明星效應呢個心理因素，就知股價冇死喇！」Eddieshop就話：「連李寧（2331）都上得市，何況劉華？只要啲粉絲每人買少少，都唔知會升到去邊！」
不過，律居就有啲保留：「佢做生意成日都蝕，買佢博衰咩！」Teabad88亦話：「劉華做戲就叻啫，講到做生意嘞喎……」志願軍好同意：「呢個概念雖然有得炒，不過奉勸大家有賺即閃！」
行業獨特內需勁
講講吓，網友將劉德華搞公司上市，變咗做劉德華「直接」上市。Athalon就話：「行業夠獨特，如果上巿嗰個係陳慧琳，仲一定會不斷入貨，內需股嘛。」Citiluck就話：「劉華個勾鼻就值2億啦！」
小飛俠2007搞笑建議：「唔知蔡楓華上市有冇得諗？不過驚佢個收票箱變咗『絕對空虛，無人觸摸似廢墟！』」Tpking亦話：「咁不如買顏福偉喇，音樂事業前途無可限量﹗」
其實劉德華真係同上市公司沾過邊，大家唔知記唔記得科網股年代，佢搞咗個andylau.com同中建電訊（138）合作，結果搞到一鑊泡單嘢呢？
http://www18.discuss.com.hk/viewthread.php?tid=4711999&extra=&page=2
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]