幾位朋友喺十年前攞咗十年車牌，眨吓眼就到期，要再攞過。建築邦嘅車牌九月到期，想唔到竟然收到運輸署通知提醒，打個電話去查問吓，運輸署竟有真人回答，有問必答，建築邦有乜嘢唔明，聽電話嘅全部解釋清楚。填表寄返運輸署後，一個星期就喺信箱裏面見到新嘅十年車牌。建築邦話：「原來運輸署咁好服務嘅，抵讚到極。」問番其他老友，個個異口同聲讚好；大記者就拉埋入境事務處嚟講，話入境處應該向運輸署學習。點解呢？原來佢與同學到台北度周末，同學大頭蝦，去到機場checkin，國泰唔准佢上機，因為佢本十年期嘅特區護照只剩番四個月就到期，台灣方面係唔准入境嘅。大記者話：「入境事務處可唔可以寄信提醒人呀？好似運輸署咁？」技術上係得嘅，不過有車牌嘅人一定少過有特區護照嘅市民好多，入境事務處要花多唔少時間。
但係如果你打電話去入境處詢問，一定被人耍到暈。冇滿意答案嘅，最叻就係叫你送張傳真過去（即書面提問），兩日後你就會收到傳真答案，服務水平同運輸署相比，差幾皮。
我哋小時候好怕去官府衙門，嗰陣時啲官不分大小，隻眼都係生在頭上，睇唔到在窗口前面排隊罰企嘅小市民。現在唔同晒嘞，英國佬留下一啲政府部門服務承諾，個個部門都跟住嚟做，態度甚好，最近先至留意到運輸署做得零舍十足十。來自大陸嘅商人最鍾意香港邊方面呢？一位大陸中型富豪曾對左丁山講過：「喺香港做生意，原來唔使巴結衙門，唔使請官員食飯嘅。我初初猛咁搵中間人介紹工商科技局啲官員畀我識，冇人敢制，啲官唔識我，服務一樣冇阻滯，好順利，𠵱家就知道香港同內地好唔同，慳番好多錢！呢樣我最鍾意！」香港自有特色，不純粹是中國另一個城市，咁就會有前途，最怕他日樣樣向中國看齊。睇完七月一日晚文娛大匯演之後，曾特首以後到會展聽演唱會，主辦單位會唔會特登喺特首旁邊放一個茶几，擺個有蓋嘅大陸茶杯響度呢？