到處留情──藝人最想到那裏旅行

到處留情──藝人最想到那裏旅行

楊怡
星馬食好嘢

「如果有個短短嘅假期,我最想去新加坡同馬來西亞,因為呢兩個地方都好近,去起上嚟都好方便,其實呢兩個地方我都去過,但係我都好想再去,最主要係去食嘢,馬來西亞可以主力食嘢,新加坡就可以曬太陽同食好嘢,只要有五日就夠去。我自己都係想去relax吓,如果係去shopping就唔得了,會控制唔到自己。」

郭晉安
遊英博物館

「嚟緊最想去旅行嘅地方係英國,對上一次去英國係六年前,我本身好鍾意睇博物館,每次去都冇可能睇得晒,仲有最好可以約埋班波友一齊睇埋溫布頓網球賽,陳豪同鄭嘉穎都係我嘅波友嚟㗎。至於英國嘅時裝都係我嘅至愛,當地嘅時裝畀人感覺好骨子同紳士。」

薛凱琪
情迷北海道

「我最想去日本北海道,除咗因為我係日本旅遊大使外,我都好想去睇吓傳說中開到好靚嘅薰衣草田,同埋浸溫泉、嘆日本菜。東京就去得多,雖然都好玩,不過大都市同鄉村地方,感受會好唔同,如果有八日以上嘅假期,我想享受一次又寧靜又有鄉土風情嘅旅程。」

鄭嘉穎
宿霧玩潛水

「我一向都好鍾意陽光與海灘,所以我都好想去宿霧,原本今個月都有朋友約我一齊去,但我要拍劇,所以去唔到,最想係可以喺嗰度一個禮拜考埋潛水牌,之前都有玩過潛水,但係一直冇時間考牌,𠵱家我諗最快都要9月先可以成行喇。」

採訪:駱華齡、魯萍、卓美娟