看通（1059）唔止平通街，股東背景仲有染紅色彩，食住北水南調，看通要買。今年5月，上實（363）阿媽上實集團喺看通嘅權益曝光，仲一路增持到家陣8%。上實集團揸咗10隻股票，有8隻係紅籌，係港資兼一路睇住增持嘅，得看通一隻。獲紅色大孖沙另眼相看，看通喺業務上會唔會染紅，或者同大孖沙有合作機會，有好大聯想。而呢期北水蜂擁，紅籌國企炒到飛起，看通股東有染紅背景，北水炒落後，看通有先機。
上實集團6月大手增持看通5560萬股或1.7%，平均成本上到0.79元，看通現價都係講緊0.81元。又看通07年半年度（12月底止），純利增長19%到1.88億銀，全年度增長係咁易維持番上半年水平，純利4億銀，PE得6倍，現價翻一番到1.62元，07年度預期PE，都係得12倍，向上大把水位。
中華網0.5元撈底
中華網（8006）由5月0.73元插到現水位，跌幅近24%，係時候睇位撈底。中華網上年尾出售網上遊戲業畀阿媽CDC，最高代價套現10億銀。要咁睇，呢壇製作，阿媽花費唔少，而中華網經出售業務後，已經有部份現金回籠，手頭淨現金連投資上到13億銀，每股淨額貼近0.3元。中華網呢隻現金牛，仍然有機會派大息，回饋各大股東。中華網再跌，睇實250日線0.5元撈底，一注博派息，一注短炒，上望6月橫行底0.6元，回報率20%，有魚有肉。
錢雋