「新馬師曾」祥哥10年前過身，一場「鄧家爭產風波」搞到滿城風雨，好多人今時今日依然記得祥嫂同四位親生仔女互罵鏡頭，對簿公堂嘅「家變」場面好過睇戲，精采程度勁過《溏心風暴》。不過兩母女邊有隔夜仇？祥嫂同小艾繼早前和好如初，擺壽宴又攬又錫，噚日仲「蹺手」現身運輸署車牌拍賣會。
10年後再重見天日
原來噚日拍賣嘅車牌當中，包括無字頭車牌「9900」，呢個牌本身都夠特別，仲係祥哥生前用咗超過50年嘅「御用車牌」。當年祥哥逝世，車牌畀運輸署收回，10年後先重見天日拎番出嚟拍賣。既然呢個牌係祥哥至愛，鄧家梗係要買番，祥嫂、小艾一於聯手出擊。現場所見，兩母女呆坐半日，一直等到「9900」出場先出手，雖然在場有唔少人吼住個靚牌，但八方見祥嫂兩母女一邊舉手一邊密斟，似乎唔理價錢，總之志在必得。
「9900」底價13.5萬，競投得好激烈，好快就bid到過20萬，其他對手開始猶豫，舉手都「𣲷𣲷哋」，祥嫂卻越戰越勇，最終以22萬扑槌成交。祥嫂買番祥哥心頭好，開心到攬住旁邊嘅小艾錫咗啖，兩母女笑容燦爛，場面好鬼sweet，八方都戥佢哋開心。諗番起當年爭產時，一家人恍如陌路人，真係不堪回首咯。祥嫂話「9900」呢個車牌對鄧家意義重大，因為個牌陪住祥哥出出入入大半生，𠵱家「物歸原主」，鄧家上下都好高興。
慈善伶王繼續行善
當年一家人為咗4億幾遺產反面，今日就母女同心投番祥哥生前個車牌，而且呢個車牌係特別號碼，拍賣收益會撥入政府獎券基金作慈善用途，一代「慈善伶王」離開人世10年後，依然可以繼續做善事，真正遺愛人間，相信祥哥在天之靈都好歡喜。
除咗「9900」之外，噚日拍賣會仲有其他靚冧巴，其中「MM9」係全日最貴嘅牌，以46萬賣出；其次係以37萬成交嘅「GG66」，「9900」成交價全日第三高。「MP3」、「HS888」、「XX886」都係焦點冧巴，最高成交價大約15萬。