美國、日本、澳洲、愛爾蘭擁有廣闊的海域，令她們經濟起飛！我係蠔姐唔係娜姐，講嘅係蠔史，話說上述國家水深海闊，自然生蠔肥美，今日就帶大家原汁原味原隻食四款靚蠔，同場加演鹿兒島和牛，真係食得幾「蠔」都得！
記者：馮冠芝
攝影：陳偉強
Model：SheenaFu
今次美麗華酒店西宮挑選6款時令鮮蠔空運到港，即開即食，推廣期至8月。不過，食蠔之前，蠔姐都係忍唔住要講吓歷史！在中國，早於宋代已有人養殖鮮蠔食用；而日本的養蠔業則在江戶1670年才開始繁盛，卻能後來居上，1923年，廣島地區發明了水中吊筏方法，大量縮短蠔的生長時間。日本亦成為現今世界產蠔大國。
不過蠔姐介紹的熊本蠔又唔算日本蠔，咁又要講一段歷史……算啦，食咗先講！
愛爾蘭石蠔（IrishRockOyster）
香港人普遍愛食日本或美國蠔，但蠔姐就貪愛爾蘭蠔──鮮味好濃郁！佢海水味冇澳洲蠔咁勁，亦冇日本蠔清甜，皆因鮮蠔味已侵佔所有味蕾，再加上佢爽口彈牙，因而完全擄掠蠔姐的心。
美國蠔（SouthBendOyster）
美國蠔亦係香港人最愛，貪佢夠大隻，夠Creamy。果然，啜入口差點直滑喉嚨，滑到好似食緊有海鮮味的忌廉咁！無論海水味及鮮味都係淡淡的，最適合先嘆佢再食其他蠔。
為保存生蠔鮮味，所有蠔空運到港後，皆會存放於4℃的冷藏庫，客人落Order時才即開即食，保證新鮮。
美麗華西宮廚師陸敬康師傅即場示範，兩三下手勢便開好一隻蠔。咁新鮮，立刻再食，今次仲可以試吓配上美式雞尾汁、秘製的醋汁及魚芥汁。陸師傅話雞尾汁百搭，配邊種蠔都可以，而酸酸哋的醋汁配上Creamy的美國蠔最Match，而用銀魚柳、洋葱等製成的芥汁，即可配愛爾蘭石蠔！
不過，蠔姐最鍾意係咩都唔加，咁先夠原汁原味。
澳洲蠔（CoffinBayOyster）
有人食蠔最愛嚐到蠔的海水味，澳洲蠔就最適合「海水蠔」一族。吃時，彷彿將整個海洋放入口，先讓濃濃的海水味在口腔飄蕩好一會，才徐徐吞下，這時繼海水味之後，鮮味才跑出來，實是多重享受！
熊本蠔（KumamotoOyster）
熊本蠔比其他蠔細隻，雖然細粒，但係一入口，蠔的鮮味四溢，更滲有清甜味，海水味不會濃得蓋過蠔的鮮甜，食完後鮮甜味殘留於口腔1分鐘之久！蠔身爽口，一啖一隻，食幾隻都唔夠喉！
講番佢嘅歷史，係二次世界大戰後，美國以戰勝國身份要求日本出口8萬盒蠔苗，日本無奈答應，但又心有不甘，便將劣種蠔苗送給美國。點知蠔唔過江唔肥，美國人貪佢的骰得嚟夠甜，從此熊本蠔移民美國扎根。
但係何以現在只有美國至有熊本蠔呢？原來喺1932至1968年間，一間化學工廠將水銀倒入養殖熊本蠔的水域──水佚灣，海水嚴重污染，自此日本就再冇呢種蠔。反而移民美國嘅同胞，逃過一劫。
同場加映：和牛西冷扒（8安士）
嚐完鮮，蠔姐都唔夠喉，決定食埋頂級和牛。來自鹿兒島的和牛，肉脂分佈達A5水準！咬一口，先嚐到岩燒的香烤味，然後，肉汁與油香融為一體，於口中瀰漫，入口即溶唔黐牙！蠔姐滿足啦！
食店資料
美麗華酒店西宮（23155155）
地址：尖沙嘴彌敦道118-130號
美麗華酒店商場2樓
營業時間：12:00n.n-2:30p.m、6:30p.m-10:30p.m
交通：尖沙嘴地鐵站B1出口直行約5分鐘，酒店設有代客泊車服務
