保險教父楊梵城，噚日再次露面，公佈佢新入主嘅民豐控股，將會大搞人壽保險業務，初期計劃請400至1000名保險從業員。睇嚟，保險從業員嘅音樂椅遊戲，好快就上演。
楊梵城已經喺今個月9號，向保監處遞交經營人壽保險業務牌照嘅申請，希望喺6至9個月內，獲發正式牌照。集團𠵱家揸住10億元現金，另外銀行信貸額度10億元，同埋正安排發行15億元可換股票據，呢啲錢全部會用嚟拓展人壽保險業務；先動用唔少過3億元，做保險業務營運資金，其餘或留番日後收購用。
楊梵城期望，公司嘅保險業務開展一年後，可以佔集團整體收入70至80%。佢指，本港人壽保險市場受保人口只得一半，發展空間好大，又好自信咁話，民豐優勢係佢可以訓練出好員工。
對於94年佢由國衛保險跳槽鵬利保險（即𠵱家盈科保險）時，傳曾有千名保險從業員跟佢過檔，佢強調，從來冇帶人走，只係大家「慕名而來」，「鍾意跟我做嘢」。楊梵城曾經做過嘅盈保，唔知有乜招數對抗呢？保險界呢場激戰，肯定好精采。華華突然諗起，小小超年頭賣咗盈保，唔知係咪預見到今日嘅情況呢？
[email protected]