華華早兩日先提到中石化，啱啱先有蘇樹林空降填咗前董事長陳同海個位，陳同海上月下旬忽然請辭，傳話佢因涉及貪污案被雙規，呢單嘢令大家產生好多聯想，但真相到家吓都未知，陳同海嘅過錯喺邊大家未睇到，但佢嘅功勞，今日就喺美國《財富》雜誌上show咗出嚟。
美國《財富》雜誌每年都會幫全球企業秤身家，設下全球500強擂台，能夠入榜份量都有番咁上下。最新公佈嘅名單，今年頭20大仍然主要由美國大企業包辦，好似第一位沃爾瑪，06年嘅營業額係3511.39億美金；咁亞洲企業唔係冇，但只得日本豐田同內地嘅中石化可以佔一席位。
超人拍馬追唔上
中石化舊年營業額達1316.36億美金，令到佢嘅排名由上年第23再升上6格，排第17，仲首次打入20大㖭。
喺前董事長陳同海帶領之下，中石化喺《財富》嘅全球排名節節上升，跑贏內地一眾石油股，威盡全國，可見佢都係猛料之人。不過，估唔到最後落得突然被撤換嘅下場，仲傳話被雙規㖭，認真令人欷歔。
內地企業近年迅速冒起，喺世界好多嘅排名中都佔上一席，風頭越嚟越勁，嗰啲喺香港起家嘅大集團好似滙控，今年排名升到22位，但連續兩年都要輸畀中石化。至於和黃雖有上榜，但就入唔到前100名，可以話超人拍馬都未追得上陳同海。
今個月初，英國《金融時報》「全球500大企業」中，工行首次入榜兼躋身10大，排第9。睇完啲內地巨無霸嘅全球威水成績，大家係咪覺得，啲中資股炒到飛起，其實都唔係冇理由嘅？！
[email protected]