花旗股市前晚無端端升咗成300點，真係唔知發生乜嘢事，要畀個理由佢，應該就係挾淡倉，昨日恒指一開就係23199，破咗23000關，收市雖然低咗100點，仲有290點進賬。
指數就真係升得好勁，但成交就一般，只有804億，咁嘅成交顯然唔配合呢個創新高破23000嘅日子，股民冇勇氣入市，應該係怕花旗股市昨晚冧番落嚟，同埋呢兩日國內會宣佈加息，不過實情又會係點？
花旗股市前晚升幅好大，但成交亦唔係好配合，如果話昨晚跌番啲都好正常，反而，如果唔跌，嗰邊啲淡友就真係要過一個「黑色星期五」嘞，因為睇技術走勢，如果昨晚花旗股市再升，幅度唔會細。無論如何，花旗股市仲係向上，未來走勢只會係大漲小回。
至於國內股市，昨日並冇跟隨花旗股市升，投資者咁審慎，都係怕加息，睇番早幾日嘅貨幣供應數字，呢兩日唔加，下禮拜要加息可能冇得避免，不過，加息係延續性嘅政策，未來仲會係咁行，加息係因為經濟好，唔係因為經濟差，所以唔使睇得咁悲觀。
中移動C輪3287：中移動（941）前日創新高試90元，大行紛紛調高目標價，昨日股價繼續醒神，最高升上92.70元，收市報91.95元，Keep住個靚靚嘅走勢，短線目標係100元，破位就推向110元，可以買啲中移動C輪3287。隻輪昨收1.08元，槓桿率8.5倍（有效5.6倍），正股升上100元同110元，3287應該喺1.66元同2.50元樓上，正股跌穿88元止蝕。