股神畢菲特早排批評美國稅制優待有錢人，令佢哋要畀嘅實質稅率，仲低過窮人。
畢菲特自爆：「我嘅稅率，甚至低過我個秘書同清潔工人。」佢又不滿共和黨建議撤銷遺產稅，認為咁樣只會變相加重窮人稅務負擔。
網友wiseman69大呻：「超過五成美國人每年賺少過3萬美金（大約23.4萬港元），但佢哋嘅實質稅率竟然仲高過有錢人。計我話，有錢人應該交多啲稅，中下階層就應該畀少啲。」
DJaeger亦贊成向有錢人加重徵稅，但認為好難界定點先算有錢，「一個退咗休嘅寡婦，銀行存款有幾百萬美金，算唔算有錢？佢應唔應該同有錢女ParisHilton一樣畀咁多稅？我就認為唔應該，因為呢個寡婦可能冇其他收入。」
有冇錢難界定
Yadgyu講：「如果當局立例調高有錢人嘅稅率，唔少富豪可能會請律師同會計師，研究點樣利用法律漏洞避稅。」
CRONEWITCH就反對向有錢人加稅，「好多專業人士雖然搵大把錢，但要花唔少錢讀大學，比一般人遲幾年搵錢；畢業之後，仲會欠落一大筆學生貸款；初初出嚟做嘢由低做起，要捱一段時間先出人頭地，所以唔應該加佢哋稅。」
UncleG講：「美國有錢人要交多啲醫療保健費，所以唔應該向佢哋加重徵稅。」
幾年前美國總統大選，結果由主張減稅嘅布殊勝出，建議向有錢人加重徵稅嘅克里就落敗，令美國成為富豪天堂。