前日香港氣溫高達攝氏33度，「廈門飛魚」林峯偷得浮生半日閒，專程到赤柱戲水降溫，豈料他到達後才得悉赤柱正灘發現幼鯊屍體，泳灘掛起紅旗及封閉，但膽生毛的林峯竟照樣玩水自娛，他笑言只擔心游泳時被偷拍：「我驚『人蹤』多過驚鯊蹤呀。」
近日香港天氣十分炎熱，前日最高氣溫錄得攝氏33度，難怪各個沙灘擠滿弄潮兒。連日忙於宣傳長劇《歲月風雲》的林峯，趁未開拍新劇《少年四大名捕》，也一於忙裏抽空，前日應本報邀請往赤柱戲水消暑。
林峯到達泳灘後才得悉當日較早時間，赤柱正灘的防鯊網外發現一條幼鯊屍體，康文署宣佈泳灘暫時封閉，並懸掛鯊魚旗及紅旗，故在場泳客只得小貓三、四隻，浮台空無一人，港聞記者則聚集一大堆。雖然林峯對記者多過泳客感到無奈，但依然夠膽玩水浸腳，他笑說：「我都係見到咁多採訪車先知有鯊魚，幾沮喪㗎，嚟到沙灘都唔可以游水。」
曾為校隊成員
林峯續說：「我落水唔驚，都好好彩從未見過鯊魚，但沙灘越來越多鯊蹤好唔正常，冇可能咁熱時候有鯊魚，證明鯊魚越嚟越冇嘢食，因為附近地方污染，搵唔到嘢食先會出現，𠵱家環保、氣候有太多問題，我諗再過5年，都唔使拍古裝啦。」
其實林峯很愛暢泳，籍貫廈門的他擅於水性，更曾為校際泳隊成員，稱得上是「廈門飛魚」，林峯說：「廈門仔冇乜邊個唔識游水，但我喺香港好少去沙灘，因為游慣泳池，好少游海水㗎，而且我驚人蹤多過驚鯊蹤。」
「周街狗仔隊」
林峯越說越無奈：「我可以同邊個去呀？跟同事去，時間又難就，同朋友去又驚害咗佢入鏡，我鍾意曬太陽㗎，但𠵱家周街都係狗仔隊，全港市民都係，避無可避。手提電話有攝錄功能，唔知係好事定壞事，好似我哋喺鬧市拍劇，成班人攞住個電話隊埋嚟，問都唔問吓就係咁影，唔會理你感受，有時會變咗唔尊重人，所以我都係去屋企嘅泳池曬太陽游水好過。」
採訪：朱倬誼
攝影：陳偉權
髮型：D.Y.ofHairCulture
化妝：RaymondYipofMaeVon.
