Car通：新奇事橙　FairladyZ

Car通：新奇事橙　FairladyZ

淑女豈會貪新鮮

日產Fairlady（淑女）系列，憑住優美線條同雙座位辣跑本色，早在七十年代已迅速崛起，發展到今時今日，外形上雖不致有重大改變，不過喺馬力輸出、運動化調校上，已經越出越勁，車仔細細但高達3,498c.c.，一般人實在難以駕馭呢位淑女！

記者：徐影龍
協力：鄭達基、黃子偉
攝影：譚盈傑
演出：Sukie@FREEZE
服裝提供：breadnbutter
化妝：王穎
髮型：PatrickChan@HAiR

喜歡原版優雅型格

除咗更型更靚嘅FairladyZ系列出現外，更有官方改車公司Nismo嘅特別版登場，全車加晒碳纖裝飾、Momo軚環、短波棍等Sport版特色，但我嫌Nismo版過份做作，失去「淑女」本身優雅＋型格嘅風采，反而今日呢架「純正血統」更合我心水，尤其內櫳以粉橙色桶椅配黑色車廂，色調配搭出奇地柔和舒服。
引擎、波箱等跟Nismo改裝版一樣，故性能上可算毫不輸蝕；280匹馬力，筆者喺入聖士提反灣途經嘅香島道一段，稍踏油門快放，其瞬間爆發力已令我相當得心應手，剔除單程慢車、塞車情況，喺連續彎特別多嘅山路上，都可盡情扭彎，而且手波操作始終得心應手啲，一大段彎路上不斷2波、3波中上上落落，操控感爆晒燈，對筆者嚟講可算久違了的揸車樂趣！

■桶椅設計較寬闊，男士坐落都唔會有壓迫感。

■內櫳闊大坐得舒服，亦不須像Lotus般瞓喺度揸。

■一身流線造型，令人拜服這位淑女的曲線美。

一個美麗的幻想

■很喜歡不斷穿梭遊走、跨山越嶺。幻想能駕着FairladyZ隨意奔馳，盡情發揮280匹超強馬力。

■在和暖陽光下，無拘無束令我愜意。

■不斷升波拖波，享受操控在手之興奮感覺。

■跑得倦了，伸伸懶腰便再上路。

■每看到橙色，心底總泛起莫名親切感。

■因為我天生便擺脫不了橙色。

■一生面對，但我欣然接受。

■從不抗拒、生厭。

■就如Andy喜歡他的愛驅一樣。

■望你對我美麗身軀也同樣留戀。

■雖然舉目皆是我喜愛的形狀、色彩。

■偶而抬頭更可看到璀璨煙花。

■身處FairladyZ闊大車廂、軟熟桶椅上，本應覺得心滿意足。

■但遺憾是很多東西從未遇過、搞不懂。

■尤其在螢幕上見過醉人的夕陽，苦無親身目睹機會，因為——

Specification

引擎：3,498c.c.V6DOHC
馬力：280ps/6,200rpm
扭力：37.0kgm/4,800rpm
傳動：6前速手波，後輪驅動
0-100km/h：5.9秒
極速：250km/h
車輛提供：富利堡（28776700）

爛玩星Sukie

上個禮拜影過女子組合FREEZE嘅陳樂榣（Aelly），今日輪到石詠莉（Sukie）上陣。大家咪睇佢上鏡成熟斯文，實則乃活潑爛玩星一名，每當攝影師換電、度構圖等空檔，Sukie就會做一大堆鬼馬動作，如扮機械人、四圍彈，甚至同人猜枚等，相當之好動，最意外是鏡頭前絕對專業，識得自我換Pose兼表情十足。
同佢講開揸車，小女子居然有棍波貨Van牌，仲識得講拖波掟彎、點同的士佬鍊等，認真唔簡單！

50人製作花絮

要影夕陽靚景，有同事提議赤柱聖士提反灣，卒之一行人殺落去由朝影到晚。唔係講笑，現場真係有成50人喺度搭景、封路同Set燈，仲有差人到場昅到實，相當大陣仗！不過當然唔係我哋隊Crew啦，只係撞正人哋拍戲，大家齊齊爭景影相啫。