自《學警出更》播出後，陳鍵鋒（Sammuel）飾演嘅柏翹令人覺得佢不再男孩，反而多了幾分Man味，加埋佢試今日極有霸氣嘅寶馬X5越野四驅車，兩者相溝可算剛陽味十足！Sammuel開宗明義話愛死大大架嘅Jeep，人多嘢多都咁方便，雖然起初唔習慣X5個電子波棍系統，不過熱身15分鐘後，已漸漸能熟練運用，盡情喺山上升波拖波掟彎，直路快放，基本上不能用High嚟形容，簡直咬牙切齒怒劈上山，好Man呀！
記者：梁美甜
攝影：陳偉強
操控靈敏攻彎一流
Sammuel一夠秤就跑去學車，擁有10年揸車經驗，「我不嬲都鍾意刺激同速度感，而且好享受自主嘅感覺！」咁鍾意自己話事？就由你揸架寶馬X5，任你周圍去，我最多做跟班。超初Sammuel對X5尚有保留，喺空地慢慢兜圈，而且睇得出佢想轉+/-波嚟揸，不過卻摸不透X5個新電子波棍系統，故表現得穩穩陣陣。點知十多分鐘後，Sammuel已能熟練掌握電子波棍竅門，登時大踩油門、直飆上山！一見彎路識得拖波收車、Keep住轉數攻彎，過咗彎心再畀大油出彎，動作一氣呵成，不論大彎、細彎、連續彎佢都飆得咁爽！
揸咗一輪後，Sammuel興奮地落車，仲讚X5超爽超正，「第一次用電子波棍唔係咁習慣，但好得意，部車整體好Sensitive，鍾意佢嚟就嚟，反應好好，揸起嚟好Smooth，感覺好安全好正！」
裝多啲人一齊玩
總覺得揸親Jeep嘅都係比較粗獷嘅男人，Sammuel咁官仔居然鍾意Jeep仔？「佢勝在夠大架嘛，可以載多啲人，尤其係屋企人㖭；家姐最近又生咗小朋友，咁我咪可以車大B細B（姨甥）同屋企人一齊出街囉！又或者得閒同朋友或者同事去玩去睇首映都好方便，4,000c.c.馬力又夠，一車過就可以出發！」
X5原裝版有5座位，更可Option加至7人，想載多幾個都得啦！車尾仲有個尾箱可以擺嘢，「最啱家姐擺奶粉袋！」Sammuel笑說。「可能揸得多，𠵱家覺得四門房車普通咗啲，加上房車又或者七人車係就可以載多啲人，但就唔夠速度感，都係Jeep仔好！」
愛高瞻「遠」見
除咗鍾意Jeep夠馬力夠速度之外，Sammuel仲有一個原因，「Jeep通常都比較高身，可以望遠啲，感覺好開揚仲好有空間感；我最鍾意揸車去郊區，尤其係可以見到好多綠色樹木同埋海就最正。天氣好溫度唔係咁高嘅話我仲會開埋窗，享受沐浴在大自然嘅感覺，好舒服㗎！」由佢講嘢時不期然流露出嚮往而滿足嘅神情，咁一定鍾意喺外國揸車啦？「係，第一次揸就係拍《衝上雲霄》嗰陣，第一次攞國際車牌，先知個牌係好大張紙，拎出拎入唔方便，不過就可以喺外國享受到揸車嘅爽快速度感，放工時仲可以載埋杏兒、Bosco、阿Ron等成班人去食飯兜風，感覺好興奮，正！」
BMWX54.8iA規格
引擎：4,799c.cV8DOHC
馬力：355hp/6,300rpm
扭力：475Nm/3,400-3,800rpm
傳動：6速Steptronic半自動波、4輪驅動
查詢：BMWHK（27145271）
