秘書V與朋友到陸羽食晚飯，記起蘇施黃介紹過陸羽糯米雞，想試吓。夥計話：「要預訂㗎，經蘇施黃在電視一提。呢兩日賣多咗十零隻。整糯米雞十分花時間，唔可以即叫即製。」
電視食經幾有威力，經蘇施黃一講，食肆生意大增，一啲食肆不知好歹，自動請蘇施黃帶埋攝影隊去試靚嘢，點知蘇施黃邊食邊鬧，場面十分尷尬，呢啲食肆以後怕好難做生意。俾佢讚過嘅一間避風塘式餐廳，吸引咗電腦J，同埋一班朋友去食正嘢，點知門口排長龍，要等好耐。等都冇所謂嘞，欲食海上鮮吖嘛。最杰就係輪到位之後，電腦J等食到眼望望，呢勻就非常痛惜腰間錢咯，因為強烈感覺到食物並非valueformoney！
做食經作家十分困難，因為成為名人之後，容易俾人認得，去到餐廳一定有好位，有好招呼，有好嘢食，跟住介紹老友去，點知老友邊食邊打電話嚟鬧，你話點算好。美國《華盛頓郵報》以前有一位美食批評家（foodcritic）PhyllisRichman，承認相貌曝光後，去到任何一間餐廳都受到極好款待，搞到佢寫不下去！
《費城調查報》（PhiladelphiaInquirer）一位好著名食經作者CraigLaBan，冇外人知道佢係邊個，此人寫飲食指南，封面上佢用五條法國式長麵包遮住自己，而LaBan梗係筆名啦，佢到餐廳試菜，用唔同名字訂位，有時化裝出行。最近LaBan批評一間餐廳嘅牛肉「既肥且韌，沙律既濕且酸」，竟然俾餐廳控告誹謗，呢樣唔算煩，美國人打慣官司嘅啦，但法庭下令LaBan以真面目在錄像機前提供證詞，咁就杰咯，因為公眾會認得出佢，以後點去餐廳試菜評彈呀。此官司有排都未開審，LaBan仲可以繼續寫食評，但前途難卜。美國人辦報認真，食評家力求公正，不以真面目示人，值得佩服。不過八卦之心，人人有之，到LaBan官司開審之日，相信好多費城市民以至全美國大廚、餐廳東主都想知道佢係甚麼人。