呢個Topic已經俾潮書、電腦書講到爛，iPhone有乜嘢玩，邊個唔識先？問題係，香港User從來都係紙上談兵，今次《蘋果》由特別途徑班到部iPhone真貨，仲拎埋去旺角行人專區畀街頭潮人任玩任試，掂過嘅人個個讚不絕口！Mac友仲話，iPhone成名技Multi-Touch同睇官方片時一樣咁流暢，仲特登用手指尾拉西，玩到佢盡！
記者：陳國輝 攝影：伍慶泉
Model：Lo 協力：馬靜兒、許福合
1解鎖開機：
仲㩒「＊」掣解鎖？你Out唔Out啲呀！備用狀態下，如果想解除iPhoneKeyLock，你必須用手指由左至右滑一下，輕輕力就Detect到，解鎖極輕鬆。
2縮放相片：
利用兩隻手指張開或者縮埋，即可控制相片放大及縮小，情況同幾年前睇靚佬湯套電影《未來報告》一樣，不同者係大家𠵱家就玩到，唔使對住個戲院銀幕發夢。
3文字放大：
中文版未出，惟有用住英文SMS先！VirtualKeyboard嘅敏感度極高，如果驚打錯，可以用手指長㩒該段文字唔放，跟住文字會局部放大，Check吓有冇串錯啦！
4人肉幻燈：
有時睇相真係要搵Slide輔助，起碼慳番人手Click來Click去嘅時間！iPhone亦有呢項功能，更追加手指向左或向右撥一下換相，感覺好似揭緊相簿咁，Feelsogood！
5捽碟聽歌：
咪以為iPhone內置捽碟功能，畀你自製獨家鈴聲！查實呢樣係iPod分唇之一，只要將手機打橫，畫面立即會出現一堆CD封套，用你隻手指左右兩邊捽就可以揀歌喇！
6左右碌網：
美國佬鍾意拍片放上網娛人娛己，連iPhone亦內置YouTube專網，等你一邊用手指碌，一邊揀片。上到其他網頁亦一樣，只要個芒唔夠位顯示，你就可以用手指操作。
7老虎機時鐘：
為求玩盡Multi-Touch，就連最簡單嘅時鐘設置器都擺埋上枱！玩法好似角子老虎機咁，只要用手指向下一拉，就可以調節時間，若果大力啲拉，數字仲會走得快啲！
排隊講：第一手真相
Kitty：敏感度高
「我直頭想用晒10隻手指嚟玩！iPhone敏感程度比我想像中厲害，用手指尾輕輕拖拉，咁都可以揀歌。」
Peggy：最衰無AutoFocus
「玩咗iPhone嘅影相功能之後有些少失望，既冇AutoFocus，快門反應又麻麻。好彩8GB夠我儲存好多相！」
Cindy：同Stylus感覺唔同
「用手指嚟操作實在太得意，同用Stylus篤落芒嗰種感覺完全唔同。我反而擔心萬一手指唔亁淨咁點算？」
阿傑：估唔到咁細部
「好多雜誌都勁讚iPhone，最估唔到實物係咁細部，但個芒竟然有3.5吋Wide，畫質靚過一般嘅PDA手機！」
阿撈：打直打橫自動搞點
「喺網站聽聞iPhone內置水銀器作平衡，我將部機打直打橫，個畫面都識得自己旋轉，估唔到反應咁快！」
阿晴：流暢到震
「所有Mac產品我都鍾意收藏，睇見iPhone忍唔住試個Multi-Touch,嘩！簡直同宣傳片一樣，流暢到震。」
先達Sales勁興奮！
小麗：我都唔知原來iPhone冇咗支筆，要用手指嚟控制。我試過咁多部PDA手機，都冇一部及得上iPhone運作咁順暢！」
婷婷：「嘩！個芒靚得好緊要，我行出街睇畫面依然咁清楚。不過拎上手就有少少重，但既然機身咁的骰，冇所謂啦！」
阿君：「部機好敏感，唔使下下出力㩒落去已經有反應；不過iPhone個芒實在太靚，我擔心冇任何保護嘅話好危險。」
編輯部：當玩具都正！
Steve：「同我1月份喺美國睇嗰陣感覺差不多，冇乜驚喜。當時我同行家仲以為可以即買即用，到𠵱家仲未玩得，有少少失望。」
Phyllis：「雖然電話功能用唔着，但如果有水貨賣$4,000或以下嘅話，我會考慮買返去當件玩具玩，或者當埋PMP咁用。」
阿輝：「iPhone嘅手指操作真係爽死！我之前亦睇過網上嘅試用宣傳片段，起初以為係假嘢，到真正玩過先知咁堅。」
HTCTouch撼iPhone？輸！
台灣HTC早前亦推出以手指操控為賣點嘅TouchFold，但操控範圍僅限於開啓電話簿、功能表以及多媒體檔案，受到嘅限制相當大。相反，iPhone就出神入化好多，不設Stylus，無時無刻都靠手指嚟控制，加上畫面轉動時極之流暢，甚少窒格問題，街頭用家評分，幾乎全民都撐iPhone！
售價：$7,800（4GB）、$8,800（8GB）
查詢：G-World（23966900）
AT&T解鎖最全能
雖然到𠵱家仲未解到SIMLock，但如果你真係膽粗粗上eBayBid咗部iPhone返嚟過手癮，就記得問清楚部機係咪已經「Activate」。因為每部iPhone啱啱買返嚟，只能靠AT&T的SIM卡啓動，咁就可以用到所有功能；啓動iPhone後，即使插入其他網絡商的SIM卡，亦可以用到除電話以外的全部功能。正常解決方法係到美國網絡商AT&T的網站開啓SIM卡，但前提係要有美國身份證嘅人幫你上台，必須用美國信用卡付款。不過大部份玩家未必搵到朋友喺美國幫佢開SIM，假如遇上呢類問題，可能會選擇解鎖佬幫手，但有一定風險，自己衡量吓喇！
