港台節目《開心日報》搞咗個「與名人通通話」嘅活動，被選中嘅中六女學生揀咗劉德華做通話對象，個女學生話因為媽咪好鍾意華仔，成日講華仔好勤力，做人好有堅持，因為阿媽講得多，搞到佢都鍾意埋華仔。女學生問華仔點解諗嘢咁正面同有乜嘢目標，華仔話：「目標係想身邊嘅人健康，諗嘢正面係受父母影響，總之有乜嘢困難都要勇敢啲面對。」
時間證明代表性
華仔早前俾中央電視台國際頻道選為「印象香港top10之香港名人」首位，香港富商李嘉誠嘅排名都屈居華仔之下，華仔票數比李超人多出一倍，佢首《中國人》又得到「印象香港top10之香港歌曲」首位，不過喺網上有文學家批評華仔唔夠代表性，華仔話自己有留意網上嘅新聞，佢話：「我只可以做好我自己，可能因為娛樂圈令人哋對我比較熟識。我近年成日喺內地拍戲，所以曝光率多咗，不過時間會令印象模糊，𠵱家唔可以話人哋唔啱，如果過多五至十年，人哋仲選我，咁就可以證明畀大家睇。」
另外，早排華仔親手縫製個公仔宣傳，主持車淑梅話要即場考華仔嘅針黹手藝，所以預備咗針線畀華仔即場示範，華仔即時喺塊布度縫咗個A字。
