日本歌姬濱崎步早排來港同余文樂拍攝音樂短片《距愛~DistanceLove~》，阿Net都好心急究竟拍成點，最近終於喺YouTube度睇到短片上半部份。我哋咪成日叫佢「步姐」嘅，原來佢都好受落，MV就見到佢睇八卦雜誌《忽然1日》嘅場面，睇嚟佢對香港傳媒好熟悉喎！
慘被拆散
短片上半部份採用步姐充滿夏日氣息嘅快歌《glitter》，故事橋段有啲似西片《護花傾情》（TheBodyguard）。步姐今次做番自己，講佢來港宣傳時遇上保鑣余文樂，由於樂仔保護佢時一臉認真，吸引步姐情深款款咁望住樂仔，點知呢一幕俾雜誌影到，條題仲話佢有個靚仔保鑣㖭。
及後步姐喺影樓影相，盞燈突然跌落嚟，樂仔即刻飛撲救佢，步姐之後用電腦詞典打咗句中文「謝謝你救了我」畀救命恩人，之後兩人當然墮入愛河啦，佢哋又拖手又去大牌檔食嘢，最後仲咀嘴㖭，但始終因地位懸殊而被迫分開。
唔少人睇咗MV後，都喺「香港討論區」度話期待下集，又話好羨慕樂仔能夠同步姐又攬又錫。步姐隻新細碟下星期三就推出，阿Net都希望佢有好成績啦。
香港討論區
網址： http://www4.discuss.com.hk/viewthread.php?tid=4695113
版主：阿Net
本欄逢周一至五刊出