識飲識食識煲湯的淑儀姐Gigi黃，睇佢個節目《吾湯吾水》，都知佢對食有幾認識、有幾堅持，淑儀姐話：「我都鍾意四圍搵平嘢食㗎，特別我係會自己煮嘅，平日出街食，一睇就知邊啲抵邊啲唔抵，好多時都覺得啲餸貴㗎！」但平嘢淑儀姐又會好小心揀：「一蚊碗燕窩又唔敢食喎！」
記者：廖秀娟、趙珮倩
攝影：楊錦文、
梁細權、陳偉強
OneBar
$10隻塔斯曼尼亞生蠔（原價：約$28/隻）
有平嘢食，邊個唔想？但一味平而唔靚正，情況可能好恐怖，食咗紙皮豬肉包、萬年油火鍋就唔好啦！好彩，香港食肆大減價，主要都係想做宣傳，以成本價、甚至蝕本價做幾款菜式，希望各位貴客多啲幫襯咁啫！十年前的「一蚊雞」證明真係有咁大隻蛤乸隨街跳，今日佢又捲土重來，加埋仲有幾間都係平靚正的餐廳，我哋梗係要帶大家去搵着數啦！
澳洲轉冷蠔當造
今次淑儀姐帶我哋去中環的OneBar食10蚊隻生蠔，全部每日新鮮澳洲塔斯曼尼亞運到，要求高的淑儀姐食完點頭微笑，「真係冇花假！」佢仲讚呢個Promotion有誠意，「因為呢個時候澳洲開始轉冷，蠔開始變肥當造；Tasmania的海水係澳洲最早變凍的地方，香港剛踏入夏季，即是澳洲剛踏入冬季，食TasmaniaOyster，既當造，同時亦提醒大家可以開始食澳洲蠔嘞。」鍾意食生蠔，特別愛金屬味重的蠔Fans，要特別留意嘞！
評語：生蠔只要新鮮、肥美、當造就係好，這些當造的塔斯曼尼亞生蠔，完全符合資格，海水味還新鮮的保留着，唔……鮮味無比！
抵食度：ννννν
珍寶大蝦配蘑菇番茄芝士$248（自助餐價錢）
淨食生蠔「未夠皮」，可試OneBar出名三道菜皇牌海鮮自助餐，主菜越南大頭蝦，Size幾近龍蝦，大廚特意用白蘭地、番茄、蘑菇、芝士做汁，再在爐上烘曬，汁濃香口，與較淡味的淡水大頭蝦很匹配。
脆焦糖蛋糕$30/件（加雪糕$55/件）
蘇施黃最愛的脆焦糖蛋糕，鮮忌廉配鬆軟無比的蛋糕，不太甜又香味十足；更難得係「秘製」的脆焦糖，多一點太甜、少一分則不能令人滿足，確是完美配合，阿蘇冇介紹錯！
OneBar
地址：中環交易廣場一期3樓
電話：25222246
$10生蠔優惠條件：全無限制，只要是OneBar顧客，可以任叫。
優惠期：7月及8月
營業時間：星期一至五，12pm-10pm；星期六、日，12pm-5:00pm
備註：除OneBar外，峰景餐廳（山頂）、山頂餐廳酒吧（蘇豪區）、珍之宝餐廳（香港仔）有同樣優惠。
稻香
$1隻走地雞堂食任叫
稻香的「1蚊雞」，絕對係香港人集體回憶的一部份，96年呢隻1蚊雞一出，即時成為城中話題，之後跟風的甚麼1蚊魚翅、1蚊星斑，甚至1蚊飛台灣都有，掀起幾年呢類大劈價着數熱潮。今次「1蚊雞」又返嚟，大家都好懷念，事隔11年，其實「1蚊雞」都變咗，雞種由以前的清遠養雞變成走地穗香雞，肉質更彈牙，雞味更濃。試過，雞香味確係比平日慣食的多，雞肉亦軟韌度適中，最重要係雞隻唔會太肥，感覺健康啲，呢個我最鍾意。
評語：1歲多啲即將生蛋的走地雞，做成貴妃雞，不太嫩而夠雞味，不太老而肉夠滑，加上剛剛好的浸製技巧，賣$1實在物超所值！
抵食度：νννν
食客意見：
席小姐：「本來嚟飲茶，見一蚊雞咁抵，特登夜晚嚟試。好食呀！冇將貨就價。」
優惠條件：優惠於晚上6時至9時供應，只限堂食，外賣及攜走以原價計算。只要是「稻香」顧客，可以任叫。
優惠期：即日至7月27日
備註：以上優惠，所有稻香同時舉行。
大包$1
（專為今次優惠而做，故沒有原價）
懷舊大包好在經過改良，唔似以前用賣剩下欄料做餡；𠵱家用新鮮貴料做，鮮蝦、雞髀肉、豬肉、鵪鶉蛋，食落餡鮮味、包鬆軟，真係要「大包整多兩籠」！（全線稻香每日早上7時至9時供應）
稻香
地址：尖沙嘴加拿芬廣場3樓
電話：23671328
營業時間：7:30am-1:00am
小肥牛火鍋活魚專門店
$10碟安格斯牛頸脊（原價$68）
香港人食火鍋基本上無分四季，話之氣溫升到34度，照樣鍾意圍埋烚吓烚吓，唔怪得大熱天時火鍋店依然旺場，不時仲以劈價火鍋料搶客，好似近年分店越開越多嘅「小肥牛」，最近激賣$10碟美國安格斯牛頸脊，每2人可柯打1碟，餘此類推。咪以為賣到咁平，就會畀得幾塊牛肉你喎，一樣大大碟，夠晒兩個人食㗎！
評語：呢個價錢平時連普通肥牛都食唔到，最正係入嚟淨食1碟都得！
抵食度：νννν
2人埋單計：
安格斯牛頸脊1碟 $10
豆腐清湯底 $30
醬油、茶水（$12×2）$24
花生、小食 $10
加一服務費（$74×10%）$7.40
合共：$81.40
小肥牛火鍋活魚專門店
地址：灣仔皇后大道東141-145號恒山中心1樓全層
電話：25290660
營業時間：6p.m-3a.m
優惠細則：每2人可以$10點1碟安格斯牛頸脊，餘此類推，惟此優惠不得與其他優惠劵同時使用。
東海漁村（順德料理）
$1小菜30幾款任揀
出街食，閒閒哋嗌碟小菜都要二十幾蚊，$1可以食到乜？喺九龍城出晒名食順德菜的東海漁村最近就推出超過30款$1小菜任你揀，不過就要先揀選指定的優惠菜才可加$1享此着數。記者以最平銅盤蒸污糟雞半隻（$50）為例，加入$1就有多碟餸，都幾筍！
夏日優惠菜：
海鮑片花菇扣鵝掌$88
鵝掌以鮑汁燜至起膠，軟腍入味，而鮑片就有掌心咁大，大件夾好味！
銅盤蒸污糟雞$50/半隻
雞件以紅棗、金針以及多種配料一齊蒸，睇落污糟雜亂，但食落雞肉勁滑惹味，撈飯一流。
瑤柱艇皇冬瓜盅$98
湯底以老雞、金華火腿、豬𦟌熬足6小時，再加入瑤柱、帶子、蝦仁等配料，挖埋冬瓜肉食，夏日消暑極品﹗
加$1食埋地道菜：
碧綠炒雜果$1（原價$48）
順德師傅擅長以簡單食材煮出美食，好似呢味菜咁以西芹、馬蹄、白果粒等炒出家常口味，清怡開胃。
煎焗滑豆腐$1（原價$48）
豆腐煎香後再以上湯、瑤柱汁埋芡，做出清淡中見鹹香，豆腐嫩滑無比。
大良炸鮮奶$1（原價$48）
順德名菜，皮脆內軟，選用大良鮮奶，奶味香濃，一咬傾心。
2人埋單計：
銅盤蒸污糟雞半隻$50
大良炸鮮奶$1
醬芥（$5x2）$10
小食$8
加一服務費（$69x10%）$6.90
合共：$75.90
評語：$1碟小菜真係勁抵，可惜每2-6人才嗌得1碟，略嫌唔夠喉。
抵食度：ννν
東海漁村（順德料理）
地址：九龍城打鼓嶺道70-72號
電話：27188993
營業時間：6p.m.-2a.m.
優惠細則：每2-6位可選優惠菜1款，每款菜可另加入$1選擇1款地道小菜；每7-11位可選優惠菜和$1小菜各2款；12位或以上可選優惠小菜和$1小菜各3款。
