美股大發神威，周四以裂口高開之後，全日搏命「挾」上，道指和標普500收市皆創歷史新高──前者收報13861點，升283點或2.09%；後者報1547點，升28.9點或1.91%。納指表現也不弱，收2701點，升49.9點或1.88%。為甚麼美股漠視次按債券被降級、油價攀升、貿赤擴大、美元走弱，大部份零售百貨銷售下降等種種不利因素，繼續上演這不滅神話？
如果是本欄忠實讀者，又怎會覺得詫異？支撐美國經濟（或曰消費）不衰的兩條腿──樓市和股市，其中一條跛咗（樓市），如果另一隻都跛埋，整體經濟豈不跪低？到時點做「大佬」？
布殊力邀保哥仔棄商從政，擺埋個文質彬彬兼學富五車的象牙塔教授Ben哥當聯儲局主席，又怎可丟人現眼？故必定要做到腳腳七注，全世界才信佢哋乃當今世上運籌帷幄、決勝千里之「鐵三角」集團。若然功虧一簣，不但無法向江東父老交代，還會貽笑大方者！
「橋唔怕舊，最緊要受」，這趟美股急升，仍然用那「揚喜隱悲」之招數，壞數字視若無睹，好消息則大鳴大放，加上巧合地設個圖表走勢陷阱（道指現3頂），再使出一招回馬槍，所有技術分析，不信邪或跟紅頂白之士，全部都要被射落馬。
目前的環境是，淡友「瓜」直，好友未必跟到，牆頭草隨時摑兩巴、無貨的眼光光，出了貨的唔敢買；分析或評論員同樣慘情，睇淡又驚佢突然發癲，睇好又怕有較大幅調整，stockpick又唔知炒邊瓣。正如7月9日欄所指，呢個幕後「大腦」確實係奇才，花招多到令人大開眼界之餘，更加叻到使閣下唔「黐」都要醉，真係要寫個服字！