貓都要放暑假，今年就一次過湧上街玩。7月再次係吉蒂貓天下，事關麥記同地鐵不約而同推出以HelloKitty為主題的玩具。又係佢？冇新意，你咁諗就錯晒！麥記改玩扭蛋貓，地鐵則明Sell制服誘惑，連一班玩具炒家都認為︰「唔理麥記貓還是地鐵貓，總之炒得起就係好貓！」
記者︰陸俊雄
攝影︰伍慶泉、林栢鈞
Model︰Algie
麥記──盒裝有特別版炒易炒啲
本來麥記HelloKitty出得有啲濫，不過今回出新招，將HelloKitty&Friends收在扭蛋內，仲有埋紅色紙製扭蛋機。以往選擇麥記貓逐隻買，12隻消磨粉絲成個月時間。今回不得了，買盒裝多兩隻特別版！
多咗個巨型紙製扭蛋機，令炒賣開麥記玩具的老手們，都覺呢套「HelloKitty&Friends」會有番作為。銅鑼灣ToyZone負責人Terry話︰「暫時未知發售數量幾多，啲人用來炒就一定成盒買，因為多了兩隻四方形公仔，初步估計每盒會（由$280）炒至$380。如果公仔係膠做更好炒，因毛公仔向來易污糟。」97年已開始炒賣史諾比公仔的麥滿城張姑娘話︰「特別版四方形HelloKitty同Melody當然最值錢，相信可賣貴$30至$40隻，我同拍檔已打算入20至30盒套裝。」有留意Yahoo拍賣網的話，發現其實已經有人開價$450即賣。
地鐵膠貓炒上$700
麥記貓已經有售，地鐵貓就16號先開始換，最絕係要用八達通先得！星期一至五坐10程地鐵，先可加$18換一隻。皆旺商場2樓的叮噹玩具店負責人阿輝話︰「以往最好炒，好似麥記史諾比都唔會係毛公仔，同埋上一次HelloKitty車卡系列等，都係用膠，所以覺得地鐵貓會更值錢，估計會炒至$700套。」ToyZone的Terry亦認為︰「有戴帽嗰3隻可以炒至$100隻，因為玩家向來鍾意配件多，加上用膠製，市場壽命長啲。車卡仲正，最少炒貴$100。」而麥滿城張姑娘對地鐵貓也有興趣︰「上套車廂系列，我高峯期賣超過200套，最貴賣過$650套。當時要請排隊黨。車卡估計最值錢，有機會炒貴3倍，相信又要出幫手。」
的確，上套4款車卡系列，一星期都係搭5程地鐵，今次10程，認真唔講得笑。若以$5程計算再加$18吉蒂貓換購價，起錶$70隻唔奇；車卡換購價$30，暗盤價$80，6隻全套$500已經係保守估計！
現場直擊！Fans多炒味唔濃
「地鐵精英HelloKitty」系列
7月16日至9月2日，逢星期一至五用八達通搭10程地鐵加$18，換購其中一款。一套6款，每星期出1款，最後一星期可加$30，換購精英號列車連「我的地鐵好友」CD。
換購期︰7月16日-9月2日（$18至$30）
「夏日熱扭HelloKitty&Friends」系列
7月12日至8月22日，凡買任何食品滿$17，加$10可換購HelloKitty&Friends扭蛋一隻，最多可加$20換購2隻，禮券及美食券除外。散買1套12款，每星期出4款。或直接以$280購買12款加2款特別版的「夏日熱扭」精美套裝，內含12張$10美食券。大家亦可以$60獨立購買扭蛋機盒一個。