內地老一輩IT人、聯想Lenovo創辦人柳傳志，唔單止係科技業老手，亦係幫公司重組嘅「聖手」，佢喺聯想旗下專幫國有企業進行私有化重組嘅弘毅投資內，仍然兼任董事長。要幫內地企業重組一啲唔易做，更何況係國有企業？敏感地帶唔少，佢接受內地《財經》雜誌訪問時，將呢項工作比喻好似打磨玉石咁考人。
六十有三嘅柳傳志，講嘢好鬼精靈，不時拋出金句。講到做投資，佢話吸取創辦聯想嘅經驗，「大環境不好時，就尋找小環境；小環境再不好，就忍着等到環境好」。
重組企業時，不時要與地方官交涉，佢就形容有啲地方人事非常複雜，「點頭不算搖算的人特別多」。至於企業內部對重組工作亦有唔少抗衡，佢話同管理層及員工等關係微妙，從邊度落刀，動手前都要好小心研究，好似打磨玉石咁，一刀下去，如果地方錯了，就把一塊玉毀了。
[email protected]