李賽鳳與富豪醫生羅啓仁感情破裂，前日在美國丹佛法院為離婚官司出庭，二人在庭上相見如陌路，連招呼也不打一個。庭上李賽鳳的代表律師向法官表示，羅啓仁連番向傳媒爆料，已害得李賽鳳難以在港搵食，力求爭取更多的贍養費。昨傍晚李賽鳳回港後，指羅啓仁不許她回家居住及收拾屬於自己的物品，令她有家歸不得。
羅啓仁早前向傳媒發聲明，指妻子李賽鳳（Moon）與契仔宗天意有不尋常關係，更曾發現宗天意半裸藏在其睡房衣櫃內，因此他單方面向美國法院申請離婚。其後李賽鳳也發聲明還擊，指其夫與表演團團長汪小莉關係非比尋常。一對夫妻搞至互揭瘡疤，這段婚姻自然覆水難收，前日二人在美國上庭，為了解決贍養費問題，雙方律師各出奇謀保障當事人利益。
相見如陌路
「大家連招呼都冇打」
李賽鳳和羅啓仁前日一早在美國丹佛法院為辦理離婚手續出庭，雙方在代表律師陪同下現身法院，但兩人在庭上碰到面時，竟然如陌路人般互不瞅睬。前日是開庭首日，兩位當事人暫毋須出庭作證，只是互相呈交有關離婚的文件，然後再由雙方律師陳述離婚原因和財政狀況。
記者昨日與羅啓仁取得聯絡，他在電話中承認美國法院正開庭審理其離婚申請，但官司可能需要一段長時間才結束，他說：「阿Moon係返咗丹佛同我打離婚官司，我同佢喺法庭見到面時，大家連招呼都冇打，第一日上庭雙方都係呈交文件，阿Moon個律師同法官講，話阿Moon冇錢，我就大把錢，又話我喺香港係咁向傳媒爆佢啲負面消息，搞到佢喺香港搵唔到食，我個律師聽完佢律師咁講，幾乎笑到跌落地下。」
贍養費拉鋸
「一毫子都唔會畀佢」
羅啓仁續說：「佢個律師只係話我爆料，但佢冇講過我講嘅嘢係咪事實喎！其實我都冇講佢啲乜嘢，只係講出一啲事實出嚟。後來我嘅律師同法官講，話李賽鳳係名人，大把錢，但佢嘅代表律師即刻澄清話李賽鳳唔係名人，佢係冇錢嘅！其實講嚟講去咪係想我畀兩年半贍養費佢，但老實講，我係一毫子都唔會畀佢。仲有之前我個劇團喺香港公演《兵馬俑》呢個舞台劇，申請場地係用佢間舞蹈學校嘅名義，但啲賬目到𠵱家都未交代。」
由於離婚官司要等法院再排期開審，李賽鳳昨日已先行返港，待律師通知才再返美國出庭。昨日傍晚約6時半，她獨自步出機場，記者問她為何如此快回港？她說：「原本我同羅啓仁喺丹佛有個屋企，咁呢次返到美國，我係想返去攞返自己啲物品，但佢搵咗個保安看實間屋，唔俾我進入，仲話明我一進入就報警，搞到我有家歸不得，想攞返屬於自己嘅私人物品都唔得，喺咁嘅情況下，我惟有先返香港。」
傳賬目不清
「我唔會攞咗啲錢走」
對於羅啓仁聲言不會給她贍養費，李賽鳳說：「一切交畀律師處理啦！我都係平常心面對，至於我嘅律師喺庭上話羅啓仁不斷發放我嘅負面消息，影響到我搵食，呢個確係事實。」
提到羅啓仁指她未交代好《兵馬俑》賬目，李賽鳳帶點激動地說：「我間學校係非牟利嘅，我唔會攞咗啲錢走，不過有啲數未返，所以仲未可以同佢交代清楚。不過我覺得呢位仁兄（羅啓仁）講啲嘢，你哋信唔信，最好自己睇啦！可能人到中年，講嘅嘢會返老還童，糊裏糊塗，都唔知自己講過乜，佢要噏乜，我真係冇辦法阻止。」說罷即乘的士離開機場。
採訪、攝影：戴彩煥、馬建華、王連連、藍文浩
返港小八卦：行李牌現羅啓仁名字
李賽鳳周日孤身飛往美國為離婚官司上庭時，記者在香港機場見她只帶了一大一小兩件行李，宣稱在美國有家歸不得、遭羅啓仁拒絕入屋拿回私人物件的她，昨日回港時卻有三件行李隨身。現場所見，她其中一個行李篋上，所掛的行李牌還是用丈夫羅啓仁的英名名字和居所做登記，不知她是未忘舊情，還是純粹貪方便？
話你知：贍養費傾唔掂離婚拖1年
根據美國科羅拉多州離婚法例，若配偶任何一方單方面申請離婚，法院接過離婚申請後，會於40日內舉行狀況會議，並查明應否經審訊去處理財產權、子女撫養權及贍養費等問題。而法院最少要等候90天，經雙方同意所有如贍養費等條款後，才會頒發離婚證明，完成整個離婚程序。假若任何一方不滿其中任何一條條款，離婚手續或會拖延至6至12個月，視乎情況而定。
