腹肌、胸肌、三角肌、二頭肌，我們要暫別了。皆因我要跟韜韜（梁文韜）去馬來西亞食食食。跟韜韜去吉隆坡搵食到文東，穿州過省又食又玩，食盡榴槤、柚子、山豬、山瑞、鯊魚唇……雖然食到褲頭五星級逼爆，腰圍倍增肚腩現，不過唔理得咁多，食完先算。
記者、攝影：梁學文 鳴謝：東瀛遊
今期最紅貓山王
去馬來西亞搵食，樹上熟的榴槤是必食之選。馬來西亞的榴槤品種多，D2、D24、紅蝦、竹腳等等，各有特色，不過若論今期最紅，韜韜就首選去文東食貓山王。貓山王榴槤的特色是肉多核細粒，而且比一般的榴槤creamy好多，入口似食緊榴槤雪糕。聽韜韜講到咁好，萬分期待，就算要由吉隆坡坐一個多小時車，經過彎彎曲曲的山路，拋上拋落似坐過山車，亦在所不計。
文東其實是個鄉郊的地方，屬於山區地帶，天然資源豐富，四處都是野味、海鮮、野菜，就算在普通的一條山坑都有機會捉到鯉魚。不過所有的山珍，通通也不及這裏的榴槤。因為踏入七月份，就是榴槤開始當造的時間，即是由現在開始，就是榴槤成熟時。這裏的榴槤只有兩季，全部都是樹上熟，熟透就會自己跌下來。未熟就摘下來，就算用報紙包或者用被焗，無論包幾耐都一定唔會熟。所以，在香港買到馬來西亞榴槤的機會非常低。
開榴槤用豬肉刀
文東的貓山王，每個大小差唔多，平均重三公斤。價錢約65蚊一公斤，相比起30零蚊一公斤的D24的確是貴成倍。不過價錢重量通通都是次要，最緊要是好吃不好吃。未開的榴槤，雖然都有榴槤飄飄，不過香味一般。身邊的榴槤園主豬肉威手執豬肉刀開榴槤，對，是豬肉刀，渾勁一劈，再用「鐵沙掌」（他真的是徒手）硬扯生剝，三兩下手勢，就將榴槤五馬分「撕」。榴槤一開，嘩，那陣香味，香得來帶甜。問他為何不用榴槤刀，威哥就奉上香甜的榴槤肉，邊食邊講：「我以前賣豬肉的，賣了二十幾年，後來就接手種榴槤。文東的貓山王好出名，出名肉多核細，唔係賣花讚花香，真係好好食！」榴槤放入口，先是一陣輕輕的苦澀味，然後就是澎湃的榴槤味道，幼滑的口感，唔，真的似在吃雪糕。食完，榴槤的味道久久不散，手指甲上依然留香，陣味道比食大蒜更厲害。
山水清甜 蒸魚頭最鮮
講到明文東是個鄉郊地方，就一定會有野味食。這裏有間文東大酒樓，不可不試這裏的子椒蒸魚頭。文東山水清甜，而且清澈零污染，這裏的魚就特別大條又鮮味，尤其是黃鐮魚，就更加特別肥大鮮美，韜韜話：「黃鎌魚好難捉，因為魚鰭鋒利，容易整穿魚網，同埋用手拿的時候好易整親手，成條魚10幾斤重，一郁，分分鐘成隻手掌被扯甩。」另外，這裏的田雞大大隻，肉質夠滑又彈牙，用薑清蒸，夠清香。
文東大酒樓
電話：（60）92201230
價錢：野味餐$2,600/圍（10道菜）
地址：1&6,JalanTras,BentongPoint,28700Bentong,PahangDarulMakmur
壯陽大尾鼠湯
大同皇朝位於吉隆坡的市中心，這裏的大廚大鼻當了30幾年廚師，最拿手煮粵菜。韜韜話來這裏一定要食蘇丹魚：「蘇丹魚又叫皇帝魚，其實是以前朝貢畀皇帝食，可以進貢當然肉質好。1,400蚊港紙一公斤，在香港好少有㗎。仲有，男人要試試呢度的大尾鼠湯，可壯陽！」大尾鼠，唔，我都係齋食魚好了。
大同皇朝海鮮酒家
電話：（60）321619188
地址：Lot26,174-176A,Seksyen46,JalanAmpang,50450KualaLumpur
價錢：$300/位（9道菜）
韜韜'sCheckList
囗搭的士前要講價，馬來西亞的士好多時唔按錶收費。
囗榴槤山竹咪帶上酒店，如果令全間酒店房間都有榴槤味，會惹麻煩。
囗去山區食柚子或者食榴槤的時候，最好帶備豆蔻膏，驅蚊又止痕。
囗去餐廳搵食之前一定要訂定菜，因為菜式製作需時，即興去食未必食得到。
DaybyDay
四日三夜馬拉豪食增磅團
Day1
去文東食榴槤野味
下機後就可以乘車到文東食榴槤同野味，晚上就回市中心逛夜市。
住宿：吉隆坡
Day2
KLCC掃貨遊雙子塔
吃過早餐後就可以到市中心掃貨，下午就可以到大同皇朝或者海外天吃飯。
住宿：吉隆坡
Day3
去馬六甲買古物
乘早車去馬六甲，中午前可以到達，然後去古玩街買古玩，順便到附近的紅磚教堂參觀。
住宿：馬六甲
Day4
逛地攤掃街頭小食
早上回吉隆坡後可以到茨廠街閒逛，買買手信食街頭小食。
出門提一提
簽證：持特區護照及BNO者可免簽證。
查詢：28210800（馬來西亞領事館）
機票：國泰航空每日均有航班來回香港至吉隆坡，票價$2,400起。
查詢：27472200（國泰航空）
旅行團：東瀛遊五日四夜美食團，食足八餐馬來亞美食，團費$4,399起。團號：MKVB05
查詢：23152000（東瀛遊）
交通：一般的士上車收費兩馬幣起，每200米才跳0.1馬幣（即2毫子），夜晚按錶的話，更會收雙倍。
貨幣：$2.4港元約兌換RM1馬幣。（文中價錢已折算為港幣）
時差：馬來西亞跟香港沒有時差。
電壓：跟香港一樣電壓220V，採用三腳平插
下周吉隆坡天晴間中有雨，24~32℃
