喺物慾橫流嘅世界，係咪有錢就買到心頭好呢？對巴塞隆拿王牌朗拿甸奴窮追不捨嘅AC米蘭，俾意國傳媒爆料，指老闆貝盧斯科尼已寫好一張8,900萬鎊（約14億港元）嘅支票，買斷「細哨」合約，我求大俠計一計，呢筆巨額轉會費，除可買到「一個人」，仲買到波音最新型號客機，或者7間山頂「創世紀」豪宅，諗吓啫，我求大俠個下巴已經跌到落地。
14億貴過波音787客機
也許係「越得唔到越想得到」嘅心態作祟，貝老一直對「細哨」「不離不棄」，但唔理係點，意國行家已經將內幕消息公諸於世，披露AC快將打破「上世代球王」施丹嘅世界紀錄轉會費，將「細哨」收歸門下，冀望成為球會最新「旗艦」標誌！因為今年27歲嘅細哨，同巴塞簽到2014年，而後者亦不甘願放人，故AC若要收購成功，就要動用「買斷合約價」，亦即係意國傳媒所報道嘅14億港元！
據知「細哨」實已同意AC開出嘅5年價值600萬鎊年薪嘅合同，言之鑿鑿；我求大俠無論打《WinningEleven》或《FM》都會用奸招將卡卡、「大哨」同「細哨」買到手，組成天下無雙無可匹敵嘅「森巴三叉戟」，但無諗過現實世界中，竟有球隊能夠湊成呢個世界之巔嘅組合。
情深說話未曾講，貝老早前揚言當今球壇，只有「細哨」能令佢不惜代價豪擲銀彈；佢冇講錯呀，事關14億港元巨款，可以買到一架最新型號嘅波音787夢幻號客機，盛惠11億，仲有3億找；若果喺香港，更可以買到7間「創世紀」豪宅，甚至係超過500部法拉利跑車。一個「細哨」，如此天價，貝老先至係大豪客啊！
14億可以買啲乜
