Car通：AudiTTRoadster2.0T<br>打破傳統辣跑　圓潤霸氣

Car通：AudiTTRoadster2.0T
打破傳統辣跑　圓潤霸氣

我一向都偏愛Audi，原因很簡單，就係我虛榮！Audi外形一向吸引，而且富有速度感，又係歐洲名牌，屢獲殊榮，點講都令我心動，更比那些三尖八角、慌死人唔知佢係辣跑嘅怪獸更令我喜愛；可惜，我覺得大多數Audi都偏向大部，感覺適合男仔多過女仔，於是一直等，相距8年，終於俾我等到AudiTTRoadster開篷！

記者：梁美甜
攝影：伍慶泉
模特兒：Tiffany（TheGroup）

11秒開篷Cool爆

如果你都揸過車嘅話，一定知道好多開篷車都唔可以行住車時開合個篷。好似我呢類大頭蝦，就算想住要開要收埋個篷至開車，結果都係喺開着車至記得，於是就一定要停埋一二邊搞掂，好鬼麻煩！全新AudiTTRoadster就好體貼地為我呢類大懵嘅人設定咗一個行緊車都可以開合篷嘅Function，正到暈！就算行緊車，只要喺50公里以下，毋須停定架車，都可以隨意開合篷頂，而且只需要11秒嘅時間，型到爆！仲可以乘機Showoff一下部靚車！

■開合篷頂只需11秒，行緊車都郁得，唔怕忽然大雨！

■從車頭望AudiTTRoadster，好惡但好型，而且跑味十足！

■車尾圓碌碌，辣味中帶點可愛。

■估唔到掟彎時好咬地，勁有快感！

■大大個井字形鬼面罩，增添車頭霸氣。

揸得快尾翼自動升起

大部份辣跑都有定風翼，Audi也不例外，呢部AudiTTRoadster個尾翼會喺車速達到120km/h嘅時候，自動升起幫助穩定車身，型得嚟又實際！講真，我平時邊有可能有地方揸到去120km/h呀，唔通下下走入青馬入東涌咩！好彩個尾翼係可以手動，一按個掣都可以開關，咁隨時想起飛都得啦，我鍾意！我仲鍾意開住個篷嚟飛㖭，齋諗都開心！
見過AudiTT嘅人都知道佢外形圓頭又圓尾，全身圓潤得很；但車頭兩盞鷹式頭燈就係圓潤之中加添幾份英氣，從車頭望，仲覺得佢又強又辣！總之就係嗰句：好「跑」！

■隱藏式尾翼，揸得快會自動升起。

■配上特大18吋鋁合金胎軨，跑味濃烈。

■跑車例有嘅桶形座椅。

■中控台同上一代幾乎一樣，只係多兩粒掣。

■認住呢粒掣，行緊車都可以開合個篷！

僅6.4秒飆上100km/h

單單係諗根本滿足唔到我，見到鍾意嘅車點都要揸轉至得！上車，兩個桶形跑椅辣味十足，不過坐落就唔係話好柔好舒服，但都算好Fit個BodyShape，最想做嘅梗係即時「起飛」啦！嘩，咪講笑，呢勻完全體驗到咩叫做「推背」壓迫感！由靜止加速至100km/h都只係6.4秒，而且軚輕車靈活，對我嚟講好夠速度感，揸起上嚟仲好爽，好耐都無呢種爽爆感覺！