暑假好節目，買飛睇波，點知缺水缺糧被困大球場。為咗富咸同樸茨茅夫？係人都知為咗利物浦。講到新球季焦點，自然唔少得王子費蘭度‧托利斯登陸晏菲路，激死對王子心儀已久的費爵爺。C朗終於有對手，皆因托利斯喺西甲出晒名靚仔兼好波。連波衫店老闆都話，曼聯新衫未到，呢期個個都燙紅軍托利斯，搶盡頭彩！
記者︰陸俊雄
攝影︰譚盈傑
Model︰Jimmy@PureModel
好賣過謝拉特！
曼聯嚟緊去澳門踢波，利物浦就嚟香港熱身，明掘亞洲金。兩紅粉絲實在太多。南華就快大鬥利物浦，問過3位同樣鍾意紅軍的南華球迷會幹事，話明最想睇托利斯落場。旺角波衫店亦透露，以往紅軍最多人燙隊長謝拉特，但今期托利斯最搶，唔少球迷為睇訪港賽買衫支持。不過到8月曼聯新衫一到，論銷量就始終係紅魔係一哥，事關香港波衫市場一向紅魔天下，特別係2R（即C朗同朗尼）最好賣。
女粉絲熱買利記小物
新燙字有白邊
其他英超新衫
南華球迷會幹事阿誠：「梗係睇托利斯，但未知佢來唔來，來季高治都要讓位畀佢。」
南華30多年中堅粉絲中哥：「我係擔心托利斯未有咁快適應英超踢法，實力佢就一定有。」
南華球迷會幹事佐敦：「咁貴買返嚟，係人都想睇托利斯，其次係想睇謝拉特。」
南華vs利物浦仲有飛!
截稿前，發現7月24日（二）8:30pm的雙紅會三種票價都仲有飛，票價係$200、$150及學生飛$100。想買就要親自落大球場買嘞！
查詢：27129122（香港足總）
王子小檔案
托利斯係西甲馬體會的青訓產品，19歲已經成為球隊隊長，取代魯爾成為西班牙國家隊正選前鋒。利物浦賓帥用咗約2,700萬鎊收購，周薪9萬鎊，破球會紀錄之餘，亦令王子成為最高薪西班牙球員！咪以為賓帥同紅軍高層儍，咁多錢買個23歲𡃁仔，費爵爺早就想要佢，只係神女有心，襄王無夢啫。
王子簽名波衫
Bid上$3,232
托利斯正式轉會利物浦的記招當日，佢嘅親筆簽名波衫喺英國eBay上已被炒至205鎊（仲有3日先完），約$3,232。而去季喺馬體會件燙字球員版波衫，喺Yahoo!亦開價$1,998。真係靚仔有價！而喺YouTube上有關托利斯同佢女友的片段亦是熱Click之選。最抵死係網民都話：點解佢咁靚仔，但係女友醜過鬼！更有人話「Heismine」問你死未。
東尼帶旺拜仁波衫
據報碧咸喺皇馬4年，已經帶挈球會勁賺47億，當然大部份嚟自賣波衫，你話簽靚仔球星幾咁重要！據波衫舖老闆透露，講銷量今期除咗利記，剛來過香港的拜仁慕尼黑亦緊隨其後。事關今季誓要重振雄風嘅拜仁，一口氣收購咗意甲射手東尼、德國新金色轟炸機高路斯，及法國疤面煞星列貝利，令唔少意法國家隊球迷捧場。拜仁波衫已經靜咗好一排，今次有球星加盟，再嚟一嚟香港，成今期2號大熱，有番起色。
同場加映︰Q版曼聯球星Tee
曼聯喺香港多粉絲，鐵一般事實。喺查訪波衫新情報嘅同時，俾記者發現到Q版曼聯球星Tee，好似朗尼做出發火樣，用「Terrific」（可怕嚇人）嘅字句嚟形容，都幾抵死，曼聯迷不妨着佢去澳門睇波！令社會和諧啲嘛！特首都係咁講。
售賣點︰352大本營（27707352）
地址︰旺角西洋菜南街38至40號萬高商業大廈9樓