Jim&Chris，本地潮舖DoubleBrother創辦人。兩親兄弟98年在旺角潮流特區開舖，迄今剛好10年，初時主打二手牛仔褲和日牌水貨，後來推出自家品牌，佢哋話香港潮流一直係睇日本做頭。
「當年我哋推出自己牌子，出Tee都係學日本Tee款，當初乜都唔識，睇到原宿、仙台興啲乜就出乜。時至今日，我哋都仲係參考日本個Trend。
「日本係潮流龍頭，亞洲區No.1，因為佢哋夠膽創新，加上市場大，識玩包裝，即使小眾生意始終做得住，當藝術咁玩都有人支持。但係香港市場細，又非常商業，你玩創新騎呢大膽，啲人唔接受，一個月都捱唔住。本地品牌無本錢玩包裝創新之下，難免要跟日本。你睇RMC，明明係本地品牌，包裝都跟足日本嗰套，即刻唔同晒，啲人會寧願相信佢係日本牌子！
「點解香港死跟日本潮流但唔跟美國？因為美國唔多變，來來去去都係闊身板仔Look。香港人跟日本Trend，唔多唔少係傳媒吹捧！啲潮書期期有三分二講日本貨，接收嘅資訊全部來自日本，講得多就係潮流㗎喇！你一年有幾多版講本地品牌先？
「不過唔係只要跟日本就無死。01年最多本地品牌，最風光時有利時七子、仲有OHIO、Dusty等等，個個都跟日本Style，不過好多抄嚟無自己特色，質素用料又唔好。最後可以好似我哋咁企得住腳嘅，有幾多個？利時七子一早轉晒行啦。
「香港跟日本跟得好貼，雖然亞洲區香港係阿二，但點講都係跟人，所以好難會上到貴價玩Hi-end，太平嘅又會被淘汰，要保持質素，我哋嚟緊幾年都會走中價路線。」
記者：葉雪芯