出席「香港品牌發展論壇」，聽啲專家有何見解。設計大師靳用佢哋公司過去為公司設計公司標誌，品牌標誌嘅例子，如日本TohushuPaper、榮華餅家、中國銀行、太太口服液、屈臣氏水瓶、香港郵票、中銀香港鈔票、重慶市標誌等等，因有PowerPoint配合，啲標誌活靈活現，加上大師靳講解生動，我哋聽出耳油。大師靳話佢可以講兩個鐘頭，可惜呢，因大會時間所限，大師靳講咗二十幾分鐘就要落雨收柴。
左丁山印象最深嘅係日本特種花紋紙，為打入中國市場，特別邀請大師靳設計一類全新花紋紙，要融合中國文化，合中國人用。大師靳以佛教哲學、儒家哲學表現之，啲花紋紙直情靚到只可以欣賞，不可以寫字在上面。不過咁靚嘅紙，價錢唔會便宜，中國大陸消費者有冇咁嘅意願買啲咁靚嘅高級紙呀？左丁山有啲懷疑。舊年喺東京新宿京王百貨公司嘅文具部，見到啲信紙，便箋設計得非常優雅，忍唔住買咗兩叠返嚟，到𠵱家都未捨得用。日本人有銀紙、有品味，先至會有廠商生產高級紙張應市啫。
大師靳講完，輪到啲業者與專家發表意見。其中中文大學市場學系教授冼日明、零售管理協會主席關百豪、市務學會主席嚴啓明剛好都係中大新亞書院前後期同學，甚為好傾。冼教授以AppleiPod為題，不斷發揮，不愧教授本色，佢話蘋果在人類歷史上非常重要，打從亞當夏娃偷食蘋果開始，蘋果就有顛覆性，令世界大變，譬如牛頓在蘋果樹下畀蘋果跌落嚟撞親頭之後，世界便不一樣。二十世紀一九七九年蘋果電腦面世，從此科技大躍進，世界變成平面，為後來幾十年嘅科技與資訊疏通奠下基礎。香港呢？亦有蘋果出現噃（一九九五年），之後香港、台灣嘅報界生態大變，我哋可能已經唔記得一九九四年及以前嘅報紙係點樣嘅。冼教授話以前叫牌子，現在講品牌，進步好多，品字有品質、品格、品味嘅意思，而品字有三個口，就代表口味、口齒、口碑！發展品牌，一定要注重三個口，唔好淨係得把口，講就天下無敵，做就無心無力。