「我哋一上天秤控制室就要喺裏面做成十幾個鐘，食飯要用繩吊上嚟，人有三急，都要喺裏面搞掂。」擁有逾30年操作天秤經驗的「天秤手」甄師傅表示，為滿足地盤趕工的進度，工人做不完工作就不可下班，「好多時唔想困住十幾個鐘，咪迫住要快手啲，一快手，就好驚出錯，精神壓力就好大。」
地盤趕工打風照開工
操作天秤逾10年的工人阿良表示，每名工人都要在建造業訓練局上三個月課程才能入行，月入1.6萬元。「我哋日日都要好小心檢查機件先開工」，他指出，操作天秤較高危的地方，是工人先要沿着天秤的鋼架爬上十多層樓高的操作室。
強風是天秤的大敵，隨時會將天秤吹翻。天秤的控制室內，設有風速及負載顯示器。阿良指，若遇上三號風球，就不宜開動天秤，不過，若地盤趕工，即使掛上風球，只要沒有下雨，一般仍是如常運作。另外，如果發生意外，在控制室裏操作的工人固然危險，阿良說，在天秤下工作的其他地盤工人，才真正置身險境，「如果個天秤跌咗落嚟，佢哋根本冇得避！」
本報記者