施念慈前夫陳鴻業捲入日本藝人鈴木仁遇襲案，日前已被警方落案控告兩項傷人罪，陳鴻業備受官司纏身，但其前妻施念慈就活得比佢好啦，既獲圈外男友愛情滋潤，打理自資嘅公關公司，仲越搞越有起色㖭。
埋堆聽多說少
早幾日施念慈同羅傑承太太兼才女梁芷珊及三名女伴，齊到銅鑼灣TowngasAvenueCafe嘆下午茶，奇就奇在喺呢個女人堆入面，竟然攝咗個南華球員、專踢防守中場嘅文彼得，成班女人圍住文彼得係咁嗲，一傾就傾咗成個鐘，文彼得全程聽多說少，表現文靜，同球場上嘅狼胎搶波態度差得遠咯。
文彼得同兩位才女嘆茶後，離開時遇正記者，問佢𠵱家同英皇有冇約？佢話：「轉咗成年啦，𠵱家係BMA。」跟住佢就俾兩位才女夾走。事後馮仁昭打畀施念慈，問佢同文彼得搞邊科，施念慈話近日有間男士美容公司想搵代言人，佢覺得藝人做廣告代言人好公式化，想搵啲新鮮感，咁啱佢同梁芷珊相識多年，覺得對方同老公羅傑承搞南華隊波搞得有聲有色，所以梁芷珊提議佢可以考慮文彼得，大家傾落又OK，咁就一拍即合啦。
解約英皇甩難
其實以香港球員嚟講，25歲嘅文彼得都算外形四正，年前佢簽英皇之後，星途同曾先後簽英皇嘅鄭伊健、黃秋生同張家輝一樣，坐多過做，既然俾公司投閒置散，不如趁早解約甩難，另泊碼頭好過，聽講文彼得𠵱家做咗南華班主兼BMA唱片老闆羅傑承愛將，今次即管睇佢有冇本事踢出個未來啦。
