細個時候，鍾意麥提莎「只溶喺口唔溶喺手」的美味；大個之後，入口溶化的極級滋味，在和牛、鵝肝和拖羅刺身搵到！但前兩者食得多好滯又會肥，拖羅就食多啲都唔怕；最近搵到抵食的極品藍鰭拖羅，連搏殺期要ondiet的裕美都猛咁食！
記者：廖秀娟
攝影：楊錦文
藍鰭拖羅壽司
大拖羅是拖羅中最肥美的地方，中拖羅脂肪少一點，睇相都見到分別。另外兩件是午市套餐的左口裙邊及火燄三文魚壽司。
迷你葱吞拿魚腩碎刺身飯
平日最愛葱吞拿魚腩刺身飯，呢個用藍鰭拖羅做的，魚的鮮甜及魚油的香味明顯更多，香甜鮮嫩，因為免治的關係，食唔到筋，好食得交關，唔會比刺身遜色！
鱈場蟹素冷麵
魚油多的拖羅不能吃太多，有碗素冷麵，夏天，真係唔錯。麵爽口彈牙，鱈場蟹肉亦鮮甜，配開胃的蘿蔔茸酸汁，是過場好味道。
同場加映：蟶子蒜茸燒$78
海膽、蒜茸加沙律醬鋪面燒蟶子，面層香口惹味，蟶子仍然juicy鮮味，非常好的工夫與配搭，必試。
用手食壽司最滋味
裕美話晒係半個日本人，中日混血外，又曾經在山口縣住過一段日子，兼且非常鍾意食壽司，自細屋企的親子活動就係同媽咪一齊整sushi，對壽司都有啲「研究」，「媽咪教我食壽司要用手，自己揸住嚿飯冇咁易爛。然後打側舊壽司，用側面蘸少少豉油之後一啖食晒，咁魚生同飯都有豉油，一齊喺口度互相磨擦，飯中有魚香，魚中有飯香，最好味！」
不過剛剛19歲的裕美都未食過最貴的藍鰭吞拿，猛問：「點解佢咁矜貴嘅？」先唔好理點解咁極級，試試味道先講。於是裕美「徒手」夾起一件藍鰭拖羅壽司，一啖入口，「唔……」瞇晒眼咁話：「好好食呀！件魚生會喺口度溶㗎！混埋啲飯好香甜，未食過咁好味嘅壽司呀！」
魚中的勞斯萊斯滋味
曾經訪問過和歌山縣串本町的漁業工會會長，他旗下有一個大吞拿魚養殖場，佢話吞拿魚分4種：「最高級係Kuro藍鰭鮪，又名blacktuna，一條可以賣過百萬港元，其次係Minamituna，較普通的是Mebachi和Kihada黃鰭鮪，香港餐廳多數賣黃鰭吞拿。」日本每年有藍鰭吞拿拍賣會，係傳統盛事，一條成交價動輒過百萬，所以藍鰭吞拿有「魚中的勞斯萊斯」稱號。
藍鰭吞拿有一條海豚般大，可以達300、400公斤，要養3、4年才可以食用；它的腩位最肥美，脂肪分佈平均，似足雪花肥牛，是最矜貴的拖羅級數。
$144完美拖羅套餐
裕美聽完藍鰭吞拿的威水史，忽然好擔心，「咁呢餐會唔會好貴呀？」做緊promotion的午市套餐賣$180，12:45pm前離座可以八折，校啱時間$144就可以食到；唔係，更豐富的晚餐都係$338，係好抵食囉！
拖羅亦分級數，最多脂肪兼冇筋位的大拖羅最高級，但只佔全條魚5%左右，只夠兩、三客刺身份量，其他是略有筋的中拖羅，油脂較少，亦有人歡喜。由於鳴門想減低成本兼保有揀貨權利，每次入較大批的魚件，所以大拖羅、中拖羅都會出現，老闆話，為求公平，有筋冇筋不能指定，要折衷食平價上品，就有少少限制囉！
食客意見：
「第一次食藍鰭拖羅壽司，刺身真係有喺口度溶呀！唔錯！有機會會再試。」
藍鰭吞拿午餐$180
煙三文魚沙律，1大、2中藍鰭拖羅壽司，鱈場蟹素冷麵，迷你葱吞拿魚腩碎刺身飯，左口裙邊及火燄三文魚壽司各一件。
藍鰭吞拿晚餐$338
蟹籽沙律，木魚冷豆腐，2大、2中藍鰭拖羅刺身，葱吞拿魚腩碎刺身飯，牛肉讚岐烏冬，甜品。
鳴門日本料理
電話：27967788
地址：九龍灣常悅道9號企業廣場一期地下1號舖
營業時間：午市周一至六11:30am-3:00pm；晚市周日至四及假期6:00pm-11:00pm，周五及六6:00pm-11:30pm
交通：九龍灣地鐵站步行15分鐘，或德福廣場巴士總站乘224M巴士直達。座位：220個
有着數：周一至五12:45pm前埋單離座，套餐八折；星期六午市全部八折
