七月一日清早，接到電話，立即趕去威爾斯親王醫院探病。八點半左右，與一大班人到醫院餐廳食早餐，都係第一次喺嗰度食嘢啫；只見地方寬敞，食物款式唔少，湯河粉麵齊全，價錢唔貴；座上有唔少看護與工作人員。想起報紙報道前線醫護人員不滿薪酬，七一上街遊行，醫生又曾在伊利沙伯醫院靜坐要求加薪，醫管局總裁蘇利民講到背後有政治因素咁緊要，於是周圍望，睇吓啲醫護人員係唔係黑口黑面，情緒有待發洩先？
咦，唔係噃，差唔多人人笑口常開，有傾有講，滿臉自信之色，士氣甚高，可能香港人夠專業精神，爭取加人工係一件事，返工時候態度認真又係另一件事，唔會公私不分，將啲怨氣帶返醫院之故。
慣咗邊食邊睇報紙，於是到7-11買份《蘋果》望吓，店員話冇晒娛樂版，要唔要？左丁山甚少睇娛樂版，冇相干之至，點知坐低之後打開報紙，連財經版都欠奉，呢間7-11賣報紙搞邊科呀？醫院Canteen內好多人睇緊報紙，只見到兩份暢銷報啫，非《蘋果》即彼，又以《蘋果》佔多數，醫管局公關大員發佈消息，賣告白之時，請注意吓。
翻到名采版，又有咁啱嘅，陶傑是日寫香港醫療，講到：「英國撤出香港，最偉大的成就，是留下了一個遠東最好的醫療制度……但香港的政府醫院其實還很優秀……至少今天還很好……將來老了就移民加拿大吧！」講得好好啫，近幾年左丁山去過幾次威爾斯親王醫院（回歸十年，仲未改名為沙田第一人民醫院！）每次都覺得自己交稅交得好有意義，覺得香港醫療好一流，我哋嘅公立醫院、私立醫院共存嘅混合制度，其實好過加拿大；老咗，不必為醫療而移民呀，大記者去完美加旅行回來，猛話嗰邊生活他條，環境優美，但華人有事入醫院，往往講唔掂英文，不知如何是好，都係喺香港睇醫生更自在。當然喇，如果你不是在美加長大受教育嘅，叫你用英語形容畀外籍醫生聽：「我條腰有啲痠，膝頭冇力，背脊陰陰痛，心口翳悶，兼且呼吸不暢，條氣頂住……」你會唔會投降呀？講廣東話係好啲。