侍應：「老細，想食咩？」
客人甲：「今晚有咩好介紹呀？」
侍應：「清蒸龍躉好靚喎，仲有肉蟹、巨型瀨尿蝦、扇貝……」
某日在茶餐廳聽到以上對話，起初仲以為自己入錯海鮮飯店，於是極速瞄一瞄餐牌，發現果然唔只得餐蛋丁、奶茶喎，仲有海鮮小菜，最令人難以置信嘅係──龍躉都有得食。呢啲上酒樓至食到嘅菜式，閒閒哋過200蚊，但呢間茶餐廳居然以平一截嘅價錢，做出水準之作，難怪日日晚市都賣清光啦！
文：甘露露 攝影：譚盈傑
Model：Ruby
茶餐廳有海鮮賣，係真唔係呀？冇呃你，呢間位於九龍灣嘅「金利來小廚」日頭係普通茶餐廳，但一到夜晚，就會搖身一變成為有小炒、海鮮食嘅小菜館，單係海鮮就有20款選擇：瀨尿蝦、扇貝、青口、花螺、龍蝦，連龍躉都有，確係難得！
為確保海鮮新鮮生猛，老闆每日下晝會到觀塘街市買第一手靚海鮮，然後再用發泡膠盒養住放在舖頭門口，客人可以親自揀選最靚最新鮮的海上鮮俾大廚炮製，感覺同去海鮮酒家食差唔多，但價錢經濟得多。
30斤大龍躉只用腩位
「識得叫嘅通常都係熟客，知道數量唔多，所以一般都會識打電話落嚟訂咗先。」大廚口中說得如此巴閉的，是其每日限量供應的清蒸龍躉！一般大酒家會用頭腩燜或清蒸，但該店老闆卻只選用最多厚肉又最嫩滑的腩位，「龍躉來貨本身已經唔多，腩位就更少，加上要日日新鮮買，所以唔會入咁多貨，通常一日限賣10碟左右，有客訂先會預多啲。」大廚樊師傅稱。
除海鮮外，還有多達60款特色小菜，由晚上供應至凌晨5時，更會隨季節變換菜式，茶餐廳都咁講究，佩服佩服！
清蒸龍躉腩$100
龍躉日日新鮮劏，用薑葱、果皮、冬菇絲清蒸，淋上豉油熟油，吋幾兩吋厚的腩肉蒸得非常嫩滑鮮甜，火候拿揑得恰到好處。日限10碟左右，想食嘅話，預先訂最穩陣，食完用埋魚汁撈飯仲正。
芝心蝦丸$50
蝦丸全用人手打製，蝦肉爽口有蝦味，一口咬落去，芝士流出，芝士同蝦肉份量比例啱啱好，芝士不會過多遮蓋蝦的鮮味，但食嗰陣小心燙嘴！
芝士焗西蘭花伊麵 $40
集合中式材料和西式煮法，西蘭花和伊麵先用上湯煨過，再鋪上卡夫芝士和芝士粉焗，伊麵和西蘭花唔會肥淋淋，啖啖「芝」味香濃。
避風塘炒蟹 時價
除豆豉、金蒜、辣油、亁葱、辣椒外，大廚還加入了麵包糠來炒蟹，麵包糠可以有助減輕食蟹時辣椒的嗆喉感，蟹肉鮮味肉質纖細夠新鮮，喜歡的話可以要求加辣。
涼拌花皮海蜇 $30
花皮海蜇來自深水地帶，貨源有限。花皮海蜇爽脆，口感比普通海蜇豐富，拌以大豆芽菜、麻油、美極鮮醬油、蒜茸和辣油等，麻香中帶微辣，最適合做餐前小食或佐酒。
金利來小廚
電話：27998990
地址：九龍灣宏照道13號地下榮發工業中心
營業時間：24小時營業
座位：60個
交通：地鐵九龍灣站B出口，穿過德福花園平台，步行約5分鐘
