收到賓架Ｔ去咗新加坡傳來電郵，今日（七月十一日）開始，佢就會正式出任新加坡華僑銀行（OCBC）嘅環球商業銀行主管（GlobalHead,BusinessBanking），職銜係高級執行副總裁（SeniorExecutiveVicePresident）。辦公地點係新加坡總部。賓架Ｔ自從美國銀行（亞洲）賣盤，改名建設銀行（亞洲）之後，已有去意，不過消息收得密，直至上月底先至宣佈。
賓架Ｔ（錢乃驥）做銀行，真係一帆風順，喺UCLA畢業後，就加入美國銀行，三十年前仲係喺美國銀行觀塘分行做主任，不知何日上中環，後來美國銀行喺八十年代初遇上逆風，業務不振，全世界裁員，香港方面有不少人辭職或者被裁，香港啲分行重組合併，賓架Ｔ叻在紋風不動，唔辭職、冇被裁，於是好快就調往中環，一路升級，十幾年前已係SeniorVP兼美銀亞洲總裁，威風到極。
七十年代嘅香港銀行業係好賺錢，三大外資銀行（美銀、花旗、大通）不惜工本，猛請見習主任（officertrainee），訓練完畢，啲trainee學滿師就走，仍然年年照請，到中大港大校內招聘，好有氣魄。當年嘅trainee，如花旗梁錦松，大通馬時亨，今日誰人不識！與賓架Ｔ前後期在美銀受訓嘅trainee，今日好猛啫，例如美國國際集團投資總管朱泰和、蘇格蘭皇家銀行亞洲區集團董事總經理AnthonyYuen（袁鯤濤）、滙豐一姐梁高美懿，德意志銀行香港行長羅志偉、花旗亞太區財富管理主席KavenLeung、科技界名人富豪余志明、中大市場學系教授陳志輝、紐約銀行亞太區私人銀行主管EricChan等等都係。美銀唔知點解，當年可以請到咁多有潛質嘅畢業生，又肯大力培訓，可惜吖，間銀行喺香港如縮水布，今日唔知仲有冇請人，嘥晒當年啲人才。
今日啲銀行大概冇咁好心機培訓人才咯，肯讓trainee學師學足一年，跟住不斷叫佢哋到外地上堂。以前trainee嘅人工唔錯，頭兩年完全又對銀行冇貢獻，玩得好開心，唔同𠵱家銀行生意難做，請新人一上任就要佢哋周街撲存款搵按揭或者賣理財產品。